ბრიტანული გამოცემების ცნობით, მადრიდის „რეალსა“ და მანჩესტერ „სიტის“ შორის ამ ზაფხულს შესაძლოა ვარსკვლავური ბარტერი შედგეს.

ხოსეპ გვარდიოლას ინტერესი როდრიგო გოეშის მიმართ ძალიან დიდია, მაგრამ მადრიდის „რეალი“ ბრაზილიელი ფეხბურთელის გაყიდვის კატეგორიული წინააღმდეგია, სწორედ ამიტომ, მანჩესტერული მხარე ალტერნატიულ ვარიანტს ეძებს.

ჯერ კიდევ 2 კვირის წინ გავრცელდა ინფორმაცია, რომლის მიხედვითაც, ფლორენტინო პერესი ტონი კროოსის შემცვლეზე არ იზრუნებდა და ერთადერთი ფეხბურთელი, რომლითაც ის გერმანელს ჩაანაცვლებდა როდრი იყო. „რეალს“ ძალიან მოსწონს „სიტის“ ესპანელი ნახევარმცველი და მიიჩნევს, რომ გერმანელი ლეგენდის სრულფასოვან ჩანაცვლებას სწორედ ის შეძლებს.

ახლა „სიტი“ დიდი დილემის წინაშე დგას. როდრი გვარდიოლას ნახევარდაცვის ლიდერია, თუმცა ერთადერთ გასაღებს წარმოადგენს „რეალთან“ კომუნიკაციის წარმატებით დასრულებაში.

გავრცელებული ცნობების მიხედვით, ევროპის ჩემპიონატისა და კოპა ამერიკის დასრულების შემდეგ, მხარეებს შორის გაცვლასთან დაკავშირებით მოლაპარაკებები შედგება, თუმცა რა შედეგით დასრულდება ეს ყველაფერი არავინ იცის.