კარლო ანჩელოტიმ „ვილიარეალთან“ მატჩის წინ პრესკონფერენცია გამართა.

„ლუნინმა მადრიდის „რეალის“ ჩემპიონთა ლიგის ფინალში გასვლაში დიდი წვლილი შეიტანა, ტიბო კურტუას უდიდესი საფეხბურთო კლასის შესახებ კი კითხვები არ არსებობს, ის მსოფლიო მასშტაბით საუკეთესოა.“

„„ვილიარეალთან“ დაპირისპირებაში სასტარტო შემადგენლობაში ანდრეი გამოჩნდება.“

„მე და მოდრიჩი ერთმანეთს დიდ პატივს ვცემთ. არასდროს ყოფილა გაუგებრობა, ის დღესაც კი მსოფლიოს ერთ-ერთი საუკეთესო ნახევარმცველია.“

„ლუკიტას და ტონის მომავალზე ჩემპიონთა ლიგის ფინალის შემდეგ ვისაუბრებთ, ახლა ჩვენი საზრუნავი მხოლოდ „დორტმუნდთან“ მატჩია.“

„ჩავის პატივს ვცემ, როგორ ადამიანს და როგორც მწვრთნელს. ესპანელს მომავალში წარმატებას ვუსურვებ. „ბარსელონა“ მას ათავისუფლებს? ამაზე არაფერი მსმენია, მაგრამ ჩემთვის არაფერი შეიცვლება.“

„ბოლო დროს კარგი დინამიკა გვაქვს და ვეცდებით „ვილიარეალთანაც“ მოწოდების სიმაღლეზე ვიდგეთ. ეს არის კარგი მატჩები ფინალისთვის მოსამზადებლად. მასპინძლებისთვის სასწორზე ბევრი რამ დევს, სწორედ ამიტომ, ძალიან საინტერესო შეხვედრას ველოდები.“

„მილიტაო საუკეთესო დონეს უახლოვდება. ბოლო მატჩებში ბრაზილიელის დინამიკა მნიშვნელოვნად გაიზარდა. ფინალისთვის მილი შესაძლოა 100%-ით მზად იყოს.“

„საქმე ძალიან კარგად მიდის. ბოლო 2 მატჩში 9 გოლი გავიტანეთ და 0 გავუშვით.“

„ტონი კროოსი ტიპიური გერმანელია, რომელსაც უყვარს სიმშვიდე და არის გაწონასწორებული. ტონისთვის ყოველთვის უმჯობესია მოსმენა, ვიდრე საუბარი, თუმცა როდესაც ის საუბრობს, ყოველთვის ჭკვიანურ იდეებს გვაწვდის, ის გამორჩეული ფეხბურთელია.“

„„რეალში“ გარდამავალი პერიოდი კვლავ მიმდინარეობს, სადაც ვეტარანები ახალგაზრდებს ძალიან ეხმარებიან, მაგრამ ჩვენ უკვე გვყავს ახალგაზრდა, მაგრამ უკვე ძალიან გამოცდილი ფეხბურთელები, როგორც ვინისიუსის, როდრიგოს, ვალვერდეს და სხვების, ასევე უფრო მცირეწლოვანი კამავინგას და სხვების სახით.“