ალესანდრო დელ პიერო მადრიდის „რეალის“ საწვრთნელ ბაზაზე იმყოფებოდა, შემდეგ კი კარლო ანჩელოტიმ ლანჩზე უმასპინძლა. „იუვენტუსის“ და იტალიის ნაკრების ლეგენდამ „რეალში“ მიმდინარე მოვლენებსა და ჯუდ ბელინგემზე ისაუბრა.

„მე ვფიქრობ, რომ მადრიდის „რეალს“ მსოფლიოს საუკეთესო მწვრთნელი ჰყავს. ანჩელოტის შეუძლია ვარსკვლავების მართვა, ახალგაზრდებისგან მაქსიმალური შედეგის მიღება, მათი მოტივირება და ტიტულებზე ორიენტირება. კარლო საოცარი ტაქტიკოსია და თანამედროვე ტენდენციებსაც შესანიშნავად მიყვება. მეტი რა უნდა ჰქონდეს მწვრთნელს იმისთვის, რომ იყოს საუკეთესო?!“

„ბელინგემი? მას აქვს გამარჯვებულის მენტალიტეტი, მადრიდი კი საუკეთესო ადგილია შესაძლებლობების წარმოსაჩენად, დარწმუნებული ვარ, ის მწვერვალებს დაიპყრობს.“

„„რეალში“ ყოველთვის იყო განსაკუთრებული მიდგომები, მაგრამ ბოლო ათწლეულში ეს გუნდი გაუჩერებელი მანქანა გახდა. მენტალობა და ფსიქოლოგიური სიძლიერესი კოლექტივს დაუძლეველ ბარიერად აქცევს, სწორედ ამიტომ შეძლეს „მერენგებმა“ მანჩესტერ „სიტისთან“ წარმატების მიღწევა და ჩემპიონთა ლიგის 1/2 ფინალში გასვლა.“

„„ბაიერნი“ ძალიან ძლიერი გუნდია, რომელსაც ასევე დიდი ტრადიციები აქვს და არავინ იცის რა მოხდება ნახევარფინალში, თუმცა მცირე უპირატესობას მაინც ესპანურ გრანდს მივანიჭებდი.“

„ახლაც მახსოვს, რა რთული იყო სანტიაგო ბერნაბეუზე თამაში. ეს სტადიონი ყოველთვის ფლობდა მაგიურ ძალებს.“