მანჩესტერიდან მადრიდში დაბრუნების შემდეგ კარლო ანჩელოტის შვილმა, დავიდე ანჩელოტიმ ჟურნალისტებთან საინტერესო ინტერვიუ ჩაწერა...

„ჩემი მიზანი მადრიდის „რეალის“ მთავარი მწვრთნელობაა. ვიცი, რომ ამისთვის უდიდესი გამოწვევების მიღება მომიწევს, თუმცა მჯერა, რომ წარმატებული ვიქნები. მამასთან ერთად ძალიან დიდი გამოცდილება მივიღე და დღეს „ბლანკოსის“ წარმატებაში ჩემი წვლილი მაქვს შეტანილი.“

„ვინისიუსი, როდრიგო, ბელინგემი, ვალვერდე და სხვები გუნდურ ფეხბურთს თამაშობენ, მათი როლი ძალიან დიდია.“

„კროოსი? მას უკვე აქვს ტოპ მწვრთნელის თვისებები, გერმანელის ხედვა საოცარია. ტონი ყოველთვის დიდ პატივისცემას იმსახურებს.“

„ორელიან ჩუამენი და კამავინგა განსაკუთრებული ფეხბურთელები არიან, რომლებიც გამოცდილი ნახევარმცველებისგან ბევრს სწავლობენ, მათ შარშანდელ და მიმდინარე სეზონში დაცვაშიც მოუწიათ თამაში. რა თქმა უნდა, დაცვის რგოლი მათთვის კომფორტი არ არის, მაგრამ როდესაც გუნდში ამის საჭიროება დგას, კოლექტიურ პასუხისმგებლობას იზიარებენ. ისინი ახალი თაობის წევრები არიან, რომლებიც არასდროს წყვეტენ სწავლას.“

„გუნდში ფიზიკური თვალსაზრისით პრობლემები არ არსებობს, რაც სწორი მიდგომების დამსახურებაა. ჩვენ გვჯერა, რომ სეზონის გადამწყვეტ ეტაპს თავიდან ბოლომდე სრულყოფილად, უმაღლეს დონეზე ჩავატარებთ.“