კატალონიის „ბარსელონამ“ „ხეტაფეს“ 4-0 სძლია და მორიგი 3 ქულა ჩაიწერა აქტივში, მადრიდის „ატლეტიკომ“ კი „ალმერიასთან“ დაუგეგმავი ქულები დაკარგა და საჩემპიონო ბრძოლას საბოლოოდ ჩამოშორდა. ახლა სიმეონეს გუნდის მაქსიმუმი მხოლოდ ოთხეული იქნება.

ამ წუთის მონაცემით, „როხიბლანკოს“ პირველადგილოსან „რეალთან“ 10 ქულიანი სხვაობა აქვს, ხოლო თუ „რეალი“ „სევილიას“ დაამარცხებს, სხვაობა 13 ქულამდე გაიზრდება.

მეორეადგილოსან „ბარსას“ მადრიდელები 5 ქულით ჩამოშორდნენ, „ჟირონას“ კი 4-ით, მაგრამ თუ მიჩელის გუნდი გაიმარჯვებს, მეორე პოზიციაზე გადაინაცვლებს და 7 ქულით გაასწრებს „ატლეტიკოს“.

დღეს „ბლანკოსი“ „სევილიასთან“ აუცილებელი 3 ქულის მოპოვებას და ლიდერობის განმტკიცებას შეეცდება, „ჟირონა“ კი „რაიო ვალეკანოსთან“ ხვალ, 23:55 საათზე ითამაშებს.