კარლო ანჩელოტის მომავალი კვლავ ბუნდოვანია. იტალიელ სპეციალისტს მიმდინარე ხელშეკრულება 2024 წლის 30 ივნისს ეწურება. არის საუბრები იმის შესახებ, რომ კარლიტო გაახანგრძლივებს, თუმცა „რეალში“ ახალ მწვრთნელთან დაკავშირებით აზრები გაყოფილია...

ამ ეტაპისთვის სამეფო კლუბი ალტერნატიულ ვარიანტებზეც მუშაობს და მიიჩნევს, რომ კარლოს წასვლის შემთხვევასი რეალური კანდიდატურები უნდა არსებობდეს.

სამეფო კლუბის დირექტორთა საბჭოში ძალიან დიდი მხარდაჭერით სარგებლობს ჩაბი ალონსო, რომლის ლევერკუზენის „ბაიერი“ საოცარ თამაშს აჩვენებს. ბასკი სპეციალისტი მწვერვალების დასაპყრობად მზად არის, სწორედ ამიტომ „რეალში“ მის კანდიდატურას ძალიან სერიოზულად განიხილავენ.

ასევე განიხილება ზინედინ ზიდანისთვის შანსის მესამედ მიცემა. ფრანგი სპეციალისტი კვლავ უმუშევარია, თუმცა რამდენიმე დღის წინ ღიად თქვა, რომ ზაფხულში ახალ კლუბს ჩაიბარებს. იქნება ეს „რეალი“ თუ სხვა კოლექტივი არავინ იცის.

გარდა ამისა, „რეალის“ რადარიდან არ ქრება რობერტო დე ძერბი, რომლის ფილოსოფიაც და სათამაშო სტილიც მადრიდში მოსწონთ. დე ძერბი ამ ეტაპზე „ბრაიტონში“ მუშაობს.

და ბოლოს, საბოლოო ალტერნატივა ჟოზე მოურინიოა, რომელიც „რომაში“ უკვე წლებია მუშაობს, თუმცა ფლორენტინო პერესს ეჭვი არ ეპარება, რომ „განსაკუთრებულისთვის“ რეალური კონტრაქტის შეთავაზების შემთხვევაში, მოლაპარაკებები 100%-ით წარმატებით დასრულდება. „მერენგები“ პორტუგალიელის კანდიდატურას უკიდურეს შემთხვევაში განიხილავენ.

რაც შეეხება რაულ გონსალესს. „ბლანკოსში“ შეჯერებულები არიან, რომ ელ კაპიტანოს მთავარ გუნდში დანიშვნის დრო ახლა არ არის.

დაველოდოთ მოვლენების განვითარებას...