დადგა დრო, როდესაც ჩუამენი, კამავინგა, სებალიოსი და ბელინგემი ერთად არიან ტრავმირებულები, „რეალს“ კი ნახევარდაცვაში რესურსი მნიშვნელოვნად შეუმცირდა...

დადგა დრო, როდესაც ლუკა მოდრიჩს და ტონი კროოსს ერთად თამაში საკმაოდ ბევრჯერ მოუწევთ, ვინაიდან „რეალს“ სხვა ალტერნატივა აღარც აქვს.

Relevo-ს ცნობით, მომდევნო მატჩებში ლუკა მოდრიჩი განსაკუთრებულად აქტიური და მოტივირებული იქნება. ხორვატს სურს არამხოლოდ ანჩელოტის, არამედ ყველას დაუმტკიცოს, რომ მოწოდების სიმაღლეზე დგას და მისი სკამზე ჯდომა არასწორი ნაბიჯია.

„კადისთან“, „ნაპოლისთან“, „გრანადასთან“ „ბეტისთან“, „იუნიონ ბერლინთან“, „ვილიარეალთან“ და „ალავესთან“ დაპირისპირებებში „რეალს“ ნახევარდაცვაში აუცილებლად მოუწევს ლუკიტას გაცილებით ხშირად გამოყენება, ვიდრე აქამდე იყენებდა.

ამ სეზონში მოდრიჩმა 15 მატჩი მიიღო მონაწილეობა, მაგრამ მის ანგარიშზე მხოლოდ 644 წუთია, რაც იმას ნიშნავს, რომ ის თითო დაპირისპირებაში საშუალოდ 42 წუთს ატარებს მოედანზე.