კარლო ანჩელოტიმ „ბრაგასთან“ მატჩის წინ პრესკონფერენცია გამართა და საკმაოდ ბევრ საინტერესო საკითხზე ისაუბრა...

„„ბრაგას“ კარგად ვიცნობთ, ეს არის გუნდი, რომელიც სანახაობრივ ფეხბურთს ანიჭებს უპირატესობას და მადრიდში ქულების მოსაპოვებლად ჩამოდის. ჩვენ უნდა ვიბრძოლოთ და ვეცადოთ, რომ ჩემპიონთა ლიგის 1/8 ფინალის საგზური მეოთხე ტურის თავზე მოპოვებული გვქონდეს. ბრწყინვალე შანსი გვაქვს, რომლის ხელიდან გაშვებაც არ შეიძლება.“

„მოგება ან კარგი თამაში? თუ იგებ კარგი ხარ, თუ აგებ ცუდი. ვფიქრობ, გამარჯვება მთავარი უნდა იყოს.“

„ჯერ-ჯერობით არ ვიცი, ითამაშებს თუ არა ბელინგემი, ყველაფერი მის შეგრძნებებზე იქნება დამოკიდებული. ჯუდი განაცხადში შევიყვანე, მაგრამ გადაწყვეტილებას მასთან ერთად მივიღებ. ხვალ ნახევარმცველს მდგომარეობის შესახებ სრულ ინფორმაციას გამოვკითხავ.“

„ვინისიუს ჟუნიორი საოცარი ფეხბურთელია და ამაზე ყველა უნდა შევთანხმდეთ. თუ პუიოლს მასთან საუბარი სურს, დაე ესაუბროს. ფაქტი ის არის, რომ ბრაზილიელის მიმართ ხშირად არასასურველი ქმედებები ფიქსირდება.“

„ბევრი გოლის გატანა? რა თქმა უნდა, ამ კომპონენტზე ვმუშაობთ, მაგრამ სიტუაცია დაცვაშიც გამოსასოწრებელია. უნდა ვეცადოთ, რომ კარი მშრალად ხშირად შევინახოთ, ეს წარმატების ერთ-ერთი მნიშვნელოვანი კომპონენტია.“

„მერწმუნეთ, თქვენი საქმე არ არის, როდის შევცვლი მოდრიჩს და როდის მივცემ ტონი კროოსს დასვენების საშუალებას. ფეხბურთელებმა იციან, რა სჭირდება გუნდს.“

„უსამართლო კრიტიკა? გულშემატკივრებისგან ამ მხრივ აგრესია არ მიგრძვნია. მადრიდში პატივისცემას და დაფასებას ვგრძნობ. ჩემი აზრით, „რეალის“ ქომაგებს ვუყვარვარ.“

„გონსალო ინასიოს ტრანსფერი? 2024 წლის ზაფხულამდე გუნდში სიახლეები არ იქნება. იანვარში ხელმოწერებს არ ვგეგმავთ. კურტუა და მილიტაო სეზონის ბოლომდე მოედანზე დაბრუნდებიან.“

„ჩემპიონთა ლიგაზე ფავორიტები არ შეცვლინან, ვფიქრობ, მანჩესტერ „სიტის“, „ბაიერნს““ და „პსჟ“-ს ისევ დიდი შანსი ექნებათ. ამასთანავე კი ვაცხადებ, რომ ევროსარბიელზე პრეტენზიას ესპანური გუნდებიც გამოთქვამენ.“

„ბრაჰიმ დიასი სერიოზული პროფესიონალია და მე მას სათამაშო დროს აუცილებლად მივცემ. აქამდე დიასის სტატისტიკა მიმზიდველი ნამდვილად არ ყოფილა, რადგან შანსი არ ეძლეოდა. ბრაჰიმმა „მილანში“ დაამტკიცა, რომ გაცილებით მეტი შეუძლია, ის მუშაობას განაგრძობს.“

„ფორვარდები? მოთმინებაა საჭირო. როგორც როდრიგო, ასევე ვინისიუსი ბევრ გოლს გაიტანს.“

„ენდრიკი ფელიპეს ბრაზილიის ნაკრებში გამოძახება არ გამკვირვებია, ის ძალიან ბევრს მუშაობს და იხარჯება. ეს არის ერთვარი ჯილდო ფასდაუდებელი შრომისთვის.“

„მიმდინარე ფორმაციის „ბრაგა“ უბრალოდ კარგად თამაშობს ფეხბურთს. ჩვენ ყველაფერი უნდა გავაკეთოთ, რომ დაცვაში შეცდომები არ გვქონდეს. პორტუგალიელებს შეტევაში რამდენიმე ვარიაცია აქვთ, რაც დამატებით პრობლემებს ქმნის.“

„ჩვენ არ უნდა გავიმეოროთ ის, რაც პორტუგალიაში ბოლო ნახევარ საათში ხდებოდა.“