ფედერიკო ვალვერდემ „ნაპოლისთან“ მატჩის წინ პრესკონფერენცია გამართა და მეტოქეს ისტორიული გუნდი უწოდა. ურუგვაელის აზრით, ნეაპოლიტანელები ახალ ისტორიას წერენ...

„ვფიქრობ, ძალიან მნიშვნელოვანი მატჩი გველის. ჩემპიონთა ლიგაზე გამარჯვების მიღწევა უმნიშვნელოვანესი იქნება. დარწმუნებული ვარ, საინტერესო დაპირისპირება გამოვა.“

„„ნაპოლი“ ისტორიული გუნდია, რომელიც ახალ ფურცელს წერს. დარწმუნებული ვარ, იტალიელები ბოლომდე იბრძოლებენ.“

„წარსულში მომხდარი რთული ფაქტები ნამდვილად მძიმედ გასახსენებელია, მაგრამ ოჯახთან ერთად გავძლიერდი და ფეხბურთზე ვფოკუსირდი. მივიჩნევ, რომ ყველაფერი ცუდი უკან მორჩა.“

„ყველა უნდა დატკბეს ლუკა მოდრიჩის ყურებით. ხორვატი ნამდვილი მეომარი და შეუპოვარი ადამიანია, სწორედ ამიტომ გახლავთ ტოპ ვარსკვლავი ამ ასაკში. არ აქვს მნიშვნელობა თამაშობს, თუ არა ლუკიტა, ის ჩვენი გუნდის ლიდერია, როგორც მწვანე მინდორზე, ასევე გასახდელში. ვამაყობ, რომ მისგან ბევრი რამის სწავლა შემიძლია.“

„როდესაც მადრიდში მოვხვდი, ამ გუნდს საოცარი ნახევარდაცვა ჰყავდა და ახლაც ასეა. მადრიდის „რეალში“ უკონკურენტო ნახევარმცველები თამაშობდნენ. მახსოვს მაშინდელი დრო, როდესაც შემადგენლობაში მოდრიჩი, კროოსი, კაზემირო და ისკო იყვნენ. მართლაც შთამბეჭდავი გუნდი იყო.“

„წლების განმავლობაში ჩვენი სისტემა 4-3-3 იყო, ახლა კი ადაპტაციას გავდივართ და ახალ სქემას ვეგუებით, რომელიც გამოწვევებით სავსეა. მე ბევრ პოზიციაზე შემიძლია თამაში.“

„ბელინგემს ყველაფერი აქვს იმისთვის, რომ მსოფლიოს საუკეთესო კლუბში საკუთარი ისტორია დაწეროს, ის ისე გამოიყურება, თითქოს წლების განმავლობაში თამაშობდეს „რეალის“ რიგებში. ინგლისელი ფაქტობრივად უკვე ლიდერია, რაც ძალიან ბევრს ნიშნავს. ჯუდი განვითარდება და ყველას აჩვენებს, რა შეუძლია. ეჭვი არ მეპარება, ბელინგემი „ბლანკოსის“ რიგებში მრავალ მწვერვალს დაიპყრობს და ერთი საფეხურით მაღლა ავა.“

„ჩემი ოცნება სამეფო კლუბის კაპიტნობაა და მჯერა, რომ ეს მოხდება. არსად წასვლას არ ვაპირებ და წლების განმავლობაში ბერნაბეუზე ვითამაშებ.“

„ურუგვაის ნაკრების კაპიტნობა დიდი პატივი იყო. მჯერა, მადრიდშიც მოვა ჩემი დრო.“