რიკარდო კაკამ მადრიდის „რეალის“ ფეხბურთელებისა და სამწვრთნელო შტაბის მონახულების შემდეგ ჟურნალისტებთან ისაუბრა...

„მოხარული ვარ, რომ მადრიდელი ფეხბურთელები და კარლო ანჩელოტი ვიხილე. ჩემთვის ძალიან სასიამოვნოა „მერენგების“ რიგებში ამდენი ბრაზილიელი მოთამაშის ხილვა.“

„ვფიქრობ, მომდევნო სეზონი მადრიდისტებისთვის ძალიან საინტერესო იქნება. „რეალს“ ახალგაზრდული და მომავალზე გათვლილი გუნდი ჰყავს, თუმცა ეს არ არის შორეული პერსპექტივა. კარლო წარმატებაზე ახლავე ფიქრობს.“

„როგორც გითხარით, ბრაზილიელთა სიჭარბე ძალიან მნიშვნელოვანია. ეს მახარებს და მაძლევს იმედს, რომ ბრაზილიის ნაკრები მსოფლიო ჩემპიონატზე წარმატებული იქნება. ამ ეტაპზე სწორედ სამშობლოში ვცხოვრობ და შემიძლია გითხრათ, რომ ჩვენს ქვეყანაში „ბლანკოსის“ მიმართ ინტერესი ძალიან გაზრდილია, ვინაიდან აქ როდრიგო, ვინისიუსი და მილიტაო არიან.“

„ბელინგემი თანამედროვე ფეხბურთის შთამბეჭდავი ვარსკვლავია, რომელსაც უდიდესი პერსპექტივა აქვს. დარწმუნებული ვარ, ინგლისელი განვითარდება და „რეალის“ ქომაგებს ხშირად გაახარებს.“

„„რეალი“ ყოველთვის იმარჯვებს და არასდროს კმაყოფილდება მიღწეულით, სწორედ ეს აქცევს „ბლანკოსს“ ისტორიულ კლუბად.“

„ანჩელოტი ჩემი მწვრთნელი 6 სეზონის განმავლობაში იყო, მას აქვს ვარსკვლავების მართვის საოცარი უნარი.“