კარლო ანჩელოტიმ „ბილბაოსთან“ მატჩის შემდეგ პრესკონფერენცია გამართა და სეზონი შეაჯამა, იტალიელმა ასევე ისაუბრა ბენზემას გუნდიდან წასვლასა და სამომავლო გეგმებზე...

„შუეძლებელია კმაყოფილი ვიყო, როდესაც გუნდს მსოფლიოს საუკეთესო ფეხბურთელი ტოვებს, მაგრამ მე პატივს ვცემ ბენზემას და მის გადაწყვეტილებებს. ფრანგმა „რეალში“ იდეალური ეპოქა შექმნა, რომელიც ისტორიაში დიდ ადგილს დაიკავებს. კარიმმა საკუთარი თავმდაბლობით, ღირსებით, შრომისმოყვარეობით და „ბლანკოსის“ სიყვარულით, წარუშლელი კვალი დატოვა მსოფლიო ფეხბურთის საუკეთესო კლუბში.“

„ბენზემამ საბოლოო გადაწყვეტილება დილას გამაცნო, მანამდე დადასტურებულად ნამდვილად არაფერი ვიცოდი. ჩვენ იძულებული ვართ, გავიზიაროთ და პატივი ვცეთ ლეგენდის აზრებს.“

„კლუბი გარდამავალ პროცესშია, რომელიც წელსაც გრძელდება და დიდი ალბათობით მომდევნო წელსაც გაგრძელდება, ეს არ არის მარტივი მომენტი, მაგრამ ვეცდებით, რომ აქტიური სატრანსფერო პოლიტიკა ვაწარმოოთ და კლუბისთვის ისეთი ვარსკვლავები შევიძინოთ, რომლებიც წინა ხაზს უფრო წარმატებულს გახდის.“

„ჩვენ ვიცით, რომ ამ ზაფხულს არაერთი შემტევის დამატება მოგვიწევს, ეს ბუნებრივიცაა, ვინაიდან ბოლო 24 საათში წინა ხაზს 4 ფეხბურთელი დააკლდა ბენზემას, აზარის, ასენსიოს და მარიანო დიასის სახით.“

„კეინი? ჩვენ ვეძებთ ისეთ შემტევებს, რომლებსაც ბევრი გოლის გატანა შეუძლიათ, ასევე უნდა ადაპტირდნენ ვინისიუსის და როდრიგოს სტილთან. ახლა სახელებს ვერ ვიტყვი, მაგრამ რამდენიმე სამიზნე ნამდვილად გვაქვს და მათი მიმართულებით ბევრს ვმუშაობთ.“

„„რეალმა“ ასენსიოს, ნაჩოს და სებალიოსს კონტრაქტები შესთავაზა. მარკოსთვის ეს პირობები მიუღებელი აღმოჩნდა და ახალი გამოწვევის მიღება გადაწყვიტა, ნაჩეტე და სება კი კვლავ ფიქრის პროცესში არიან.“

„შესაძლოა აზარს და მარიანოს გუნდის წარმატებაში გადამწყვეტი როლი არ უთამაშიათ, მაგრამ მათი პროფესიონალიზმი დასაფასებელია, ისინი ღირსეულ გაცილებას იმსახურებენ.“

„რატომ არ ითამაშეს? მხოლოდ 5 ცვლილება მქონდა და ეს სცენარი შეთანხმებული იყო.“

„ბელინგემის ტრანსფერი? როგორც გითხარით, ყველაფერს ერთად ვნახავთ. „ბლანკოსი“ არაერთი მოთამაშის დამატებაზე მუშაობს და გვჯერა, რომ გუნდს ძალიან გავაძლიერებთ.“

„ბენზემა ყველაფერს იმსახურებს, სწორედ ამიტომ მას დიდი გაცილება უნდა მოვუწყოთ. „ბილბაოსთან“ მატჩის შემდეგ ქომაგებმა ის ოვაციებით შეამკეს.“

„დამშვიდობებისას ბენზემამ მითხრა, რომ „რეალი“ ყოველთვის მის გულში იქნება. დარწმუნებული ვარ, მოვა დრო, როდესაც ფრანგი დაბრუნდება და სამეფო კლუბის კეთილდღეობისთვის სხვა ფუნქციით იბრძოლებს.“

„ახლა დასვენება მჭირდება, ძალიან გრძელი და რთული სეზონი იყო, სადაც უამრავი გამოწვევის წინაშე დგომა მოგვიწია. ვიცი, რომ გუნდში ვრჩები და მომდევნო სეზონს ვგეგმავ, ჩემს მომავალთან დაკავშირებით კითხვები აღარ უნდა არსებობდეს.“