მას შემდეგ, რაც ოფიციალურად გახდა ცნობილი, რომ კარიმ ბენზემა „რეალს“ ემშვიდობება, ჰარი კეინის დამატება გარდაუვალი გახდა...

„რეალი“ ინგლისელი ფეხბურთელისთვის ყველაფერს იღონებს. ფლორენტინო პერესი ხვდება, რომ კოლექტივს ტოპ კლასის ფორვარდი სჭირდება, სწორედ ამიტომ პროცესებს აჩქარებს.

მადრიდული გამოცემების ცნობით, „ბლანკოსმა“ კეინისთვის წინადადება უკვე მოამზადა და მიიჩნევს, რომ შეთანხმება რაც შეიძლება დროულად უნდა მოხდეს. თავის მხრივ, „რეალში“ თამაშის პერსპექტივით თავად ჰარიც მოხიბლულია, რომელიც „ტოტენჰემს“ თხოვს, რომ მადრიდში გაუშვას.

კეინის სავარაუდო ღირებულებად 75 მილიონი ევრო სახელდება. ლონდონელებს მეტი სურთ, მაგრამ „რეალი“ იაზრებს, რომ მას 1 წელიწადში კონტრაქტი ეწურება და „ტოტენჰემი“ იძულებული ხდება მოთამაშე დათმოს.