ინგლისური გამოცემების ცნობით, სეზონის ბოლოს მატეო კოვაჩიჩი ლონდონის „ჩელსის“ რიგებს დატოვებს...

საქმე იმაშია, რომ ხორვატ ნახევარმცველს „არისტოკრატებთან“ არსებული კონტრაქტი 2024 წელს ეწურება, ახალ ხელშეკრულებაზე შეთანხმება კი ვერ დგება.

„ჩელსიში“ დარჩენა არც კოვაჩიჩს სურს და თვითონ ლონდონური კლუბიც სხვა ფეხბურთელებზე აკეთებს გათვლას, სწორედ ამიტომ ზაფხულში ამ კოლექტივს არაერთი ფეხბურთელი დატოვებს.

ბრიტანული გამოცემების ცნობით, კოვაჩიჩის ამჟამინდელი ფასი (35 მილიონი ევრო) კიდევ შემცირდება, ვინაიდან „ჩელსი“ იძულებული ხდება მოთამაშე გაყიდოს, სხვა შემთხვევაში ის თავისუფალი აგენტის სტატუსს მიიღებს.

მატეოს დაბრუნებაზე პრეტენზიის გამოცხადებას მადრიდის „რეალი“ აპირებს, ასევე ვრცელდება ინფორმაცია, რომლის მიხედვითაც, კოვაჩიჩის კანდიდატურით ხოსეპ გვარდიოლაა დაინტერესებული, რომელიც მას ილკაი გიუნდოგანის ალტერნატივად განიხილავს.

მატეოს სამეფო კლუბში დაბრუნების იდეის დიდი მხარდამჭერია ლუკა მოდრიჩი, რომელიც მისი უახლოესი მეგობარი და შვილის ნათლიაა.