ის, რომ ალვარო როდრიგესი მომდევნო სეზონიდან „რეალის“ მთავარი გუნდის ღირსებას დაიცავს და კასტილიას გამოაკლდება კითხვებს არ იწვევს, მაგრამ დაწინაურების სურვილი კიდევ ერთ მოთამაშეს აქვს...

საუბარია სერხიო არიბასზე, რომელიც მიიჩნევს, რომ მაღალი მწვერვალების დაპყრობა შეუძლია. არიბასი მთავარ გუნდში ჯერ კიდევ მაშინ მოხვდა, როდესაც კოლექტივის სათავეში ზინედინ ზიდანი იდგა, მაგრამ მას შემდეგ ბევრი რამ შეიცვალა.

კარლო ანჩელოტი ახალგაზრდა შემტევს აღარ ენდო და მისი კასტილიაში დატოვების გადაწყვეტილება მიიღო. „ას“-ის ცნობით, არიბასს რაულთან დარჩენა აღარ სურს და უფრო მაღალი მიზნები აქვს.

იმ შემთხვევაში, თუ მოთამაშეს მთავარ გუნდში არ გადაიყვანენ, სერხიოს სხვა კლუბში გადასვლა სურს, ვინაიდან მიიჩნევს, რომ მაღალ დონეზე ასპარეზობა შეუძლია.