დავიდ ალაბა „რეალის“ განვლილ მატჩებში ტრავმის გამო უქმობდა.

მიუხედავად იმისა, რომ ფეხბურთელს კლუბის სამედიცინო შტაბისგან თამაშის უფლება არ მიუღია, ის მაინც გაემგზავრა სამშობლოში. როგორც ავსტრიის ნაკრების დამრიგებელმა აღნიშნა, ნაკრების რიგებში ყოფნა თავად ფეხბურთელის სურვილი იყო და ის სამაგალითო საქციელისთვის შეაქო კიდეც.

ევროპის 2024 წლის ჩემპიონატის საკვალიფიკაციო ეტაპის ფარგლებში ავსტრიელები 2 დაპირისპირებას გამართავენ, ესტონეთისა და აზერბაიჯანის წინააღმდეგ. არსებული მომენტისათვის უცნობია, რამდენად შეძლებს „ბლანკოსის“ მცველი ასპარეზობას.

ესპანურ პრესაში ალაბას მიღებული გადაწყვეტილება არ მოუწონეს და აღინიშნა, რომ დავიდმა ბეილს მიბაძა, რომელიც თავის დროზე, სანაკრებო შეკრებებს არ ტოვებდა, მიუხედავად ლაზარეთში ყოფნისა.