კვირას, ლა ლიგის 26-ე ტურის ფარგლებში, სამეფო კლუნი „ნოუ კამპს“ ესტუმრება.

როგორც ცნობილია, „რეალის“ განკარგულებაში არ იქნება ალვარო როდრიგესი, რომელიც ბოლო პერიოდის განმავლობაში გუნდის სამატჩო განაცხადის მუდმივი წევრია და მეტიც, მას ხშირად ეძლევა თავის გამოჩენის საშუალებაც. რამდენიმე დღის წინ, ურუგაველმა გარკვეული სათამაშო წუთები მიიღო სათასო პაექრობაში „ბარსელონასთან,“ ხოლო მანამდე, მადრიდულ დერბიში მოახერხა გოლის გატანა.

გამომდინარე იქედან, რომ „დეპორტივოსთან“ განვლილ შეხვედრაში ახალგაზრდა თავდამსხმელმა მიმდინარე სეზონში რიგით მე-5 ყვითელი ბარათი მიიღო, მას მომდევნო პაექრობის გამოტოვება გარანტირებული აქვს. მართალია, მადრიდულმა გრანდმა უკვე გაასაჩივრა მსაჯის აღნიშნული გადაწყვეტილება შესაბამის კომიტეტში, თუმცა ნაკლებად სავარაუდოა მისთვის 1 მატჩიანი დისკვალიფიკაციის მოხსნა.

აქედან გამომდინარე, ალვაროს ტელევიზიის საშუალებით მოუწევს, როგორც „ელ კლასიკოს,“ ასევე „რეალ მადრიდ კასტილიას“ დაპირისპირების ხილვა.