მიუხედავად იმისა, რომ „რეალი“ ვინისიუსს „მსხვერპლად“ მიიჩნევს, მისდამი შეშფოთება დღითი დღე იზრდება, ვინაიდან ფეხბურთელის ყოველთვის ინციდენტის შუაგულშია.

კლუბი ვინისიუსის დაცვას აუცილებლად მიიჩნევს, მაგრამ პარალელურად საჯაროდ აღნიშნავს, რომ მოთამაშემ მხოლოდ ფეხბურთის თამაშზე უნდა მოახდინოს კონცენტრაცია, რასაც ამ ეტაპზე „ოციანი“ ვერ ახერხებს.

ეკრანებიდანაც ნათლად ჩანს, ვინისიუსი იმდენად გაბრაზებულია, რომ თითოეულ წვრილმანს რეაგირების გარეშე არ ტოვებს. ეს ყველაფერი კი, პირდაპირპროპორციულია მის ბურთაოობის ხარისხთან. არსებული მომენტისათვის, ის შემადგენლობაში ყველაზე მეტ ყვითელ ბარათს მოითვლის (10) და ფაქტობრივად, განსაკუთრებით ესპანეთის მასშტაბით, მოედანს არ ტოვებს კონფლიქტის გარეშე.

აღნიშნულის მკაფიო მაგალითია განვლილი „ელ კლასიკო.“ პირველ ტაიმში დე იონგთან მომხდარი ეპიზოდის შემდეგ, როდესაც მსაჯმა დააჯარიმა და ყვითელი ბარათი უჩვენა, ის ახლოს იყო გაძევებასთანაც, ვინაიდან ირონიულად დაიწყო არბიტრის გადაწყვეტილების შეფასება და მასთან დისკუსიასაც არ მოერიდა.

მანამდე დაფიქსირდა დაპირისპირება პეპე რეინასთან და ჟესტი „სან მამესზე“ შეკრებილი ქომაგების მისამართით.

მართალია, სამხრეთ ამერიკელს დიდი წნეხის ქვეშ უწევს ასპარეზობა და მეტოქე გუნდის ფეხბურთელები თუ ქომაგების მის პროვოცირებას ცდილობენ, თუმცა 22 წლის მოთამაშე, უნდა ისწავლოს ამასთან გამკლავება და უბრალოდ ყურადღების გარეშე დატოვოს მსგავსი მომენტები.

„რეალი“ სერიოზული სამუშაოების ჩატარებას აპირებს ამ მიმართულებით.