იმ შემთხვევაში, თუ ოზილი რეალში გადმოვა, ვან დერ ვაართს კლუბის დატოვება მოუწევს. გერმანელი ფეხბურთელის ტრანსფერი, მოურინიოს იძულებულს გახდის ერთ-ერთ გამთამაშებელს გამოემშვიდობოს, რადგან პორტუგალიელი მწვრთნელის გუნდში ოთხი ფლეიმეიქერია (კანალესი, კაკა, გრანერო და ვან დერ ვაარტი).

თავად ჰოლანდიელმა ფეხბურთელმაც კარგად იცის, რომ რამოდენიმე დღეში მისთვის სამეფო კლუბის კარი შესაძლოა დაიხუროს. სწორედ ამიტომ, გუშინდელი ვარჯიშის დასრულების შემდეგ, მან მოურინიოსთან ისაუბრა.

გასულ სეზონში რაფაელ ვან დერ ვაარტს ხშირად უწევდა რიკარდო კაკას ჩანაცვლება და მისმა თამაშმა გაამართლა. მან რამოდენიმეჯერ ძალიან მნიშვნელოვანი გოლის გატანა მოახერხა. გავიხსენოთ "სევილიასთან" მატჩი, როდესაც ჰოლანდიელი ფეხბურთელი შეცვლაზე შემოვიდა და გუნდს სამი ქულა ბოლო წამებზე მოუტანა.

აღსანიშნავია ისიც, რომ ბუნდეს ლიგის საუკეთესო მოთამაშეს (როდესაც ვან დერ ვაარტი თამაშობდა ჰამბურგში, იგი წლის საუკეთესო მოთამაშე გახდა), ახალი, კარგი და ძლიერი გუნდის მოძებნა არ გაუჭირდება.