იტალიელ დამრიგებელს სამეფო კლუბთან 2024 წლის ზაფხულამდე აქვს დაკავშრებული მომავალი.

მიუხედავად იმისა, რომ განვლილ სეზონში კარლო ანჩელოტიმ პრიმერა დივიზიონი და ჩემპიონთა ლიგა მოაგებინა „ბლანკოსს,“ მიმდინარეში მას არავინ აპატიებს წარუმატებლობას და შესაბამისად, დიდი შანსია იმისა, დამრიგებელი რამდენიმე თვეში „სანტიაგო ბერნაბეუს“ დაემშვიდობოს.

სეზონის მნიშვნელოვანი ნაწილი წინ არის, თუმცა „რეალმა“ უკვე წააგო ესპანეთის სუპერ თასი უშუალო კონკურენტ „ბარსელონასთან“ და ლა ლიგის მასშტაბით, 8 ქულით ჩამორჩება კატალონიელებს. აღნიშნული ჰანდიკაპის დაძლევა რამდენად შესაძლებელია, დრო აჩვენებს, მაგრამ, ფაქტია, პაპა კარლო არცთუ ისე სახარბიელო სიტუაციაშია.

Relevo-ს ცნობით, 63 წლის სპეციალისტის გათავისუფლების შემთხვევაში, ვაკანტურ თანამდებობაზე ერთ-ერთი კანდიდატი რაულ გონსალეს ბლანკო იქნება. ეს უკანასკნელი ამჟამად „კასტილიას“ წვრთნის და საკმაოდ წარმატებითაც. ახალგაზრდა მადრიდელები რეალურ შანსს ფლობენ ქვეყნის რანგით მეორე დივიზიონში დაწინაურებისა.

ინფორმაციისათვის, „ელ კაპიტანოს“ გვარმა 2021 წელსაც გაიჟღერა, როდესაც ზიდანმა დატოვა „თეთრების“ რიგები, თუმცა მაშინ, კლუბში ჩათვალეს, რომ ლეგენდა მზად არ იყო.

ახლანდელი სურათი ბევრად განსხვავებულია. რაულმა ახალ პროფესიაში მნიშვნელოვანი პროგრესი განიცადა. პარალელურად, მან რამდენიმე კოლექტივი გაისტუმრა უარით და რა თქმა უნდა, მის ოცნებას „რეალის“ მთავარი მწვრთნელობა წარმოადგენს.