ყოველი თამაშის შემდეგ იტალიელ დამრიგებელს ახალი თავსატეხები ემატება.

„ვალენსიასთან“ გამართული მატჩის მე-60 წუთზე, ანჩელოტიმ მოედნიდან გაიყვანა კარიმ ბენზემა. ფრანგმა თავდამსხმელმა ერთ-ერთი სათამაშო ეპიზოდის დროს, მარჯვენა ფეხზე დისკომფორტი იგრძნო, რის გამოც ცვლილება მოითხოვა.

აღსანიშნავია, რომ „ოქროს ბურთის“ მფლობელი არა სათადარიგო სკამისაკენ, არამედ პირდაპირ გასახდელისაკენ გაეშურა. მის ნაცვლად კი, როდრიგო ჩაერთო საქმეში.

მწვანე საფარის დატოვებამდე, 52-ე და 54-ე წუთებზე, „ცხრიანმა“ 2 საგოლე გადაცემა მიითვალა.

არსებული მომენტისათვის უცნობია, ბენზემას დაზიანების ხარისხი. ყველაფერი სამედიცინო შემოწმების ჩატარებისთანავე გაირკვევა.