„სანტიაგო ბერნაბეუზე“ გამართულ მადრიდულ დერბიში ფრანგმა ფეხბურთელმა გაიბრწყინა.

ედუარდო კამავინგა „კოპა დელ რეის“ მეოთხედფინალური პაექრობის საუკეთესო მოთამაშე გახდა. ახალგაზრდა ფეხბურთელმა შეხვედრა საყრდენის პოზიციაზე დაიწყო, თუმცა მენდის ტრავმის შემდეგ, დაცვის მარცხენა ფრთაზე მოუწია თამაშის გაგრძელება. მიუხედავად უჩვეული ამპლუისა, ედიმ შესანიშნავად გაართვა თავი დაკისრებულ მოვალეობას და ფაქტობრივად, სრული ჰეგემონია დაამყარა ფრთაზე.

მან 120 წუთის განმავლობაში 79 პასი შეასრულა (91 % სიზუსტით). 14-დან 12 დუელი გამარჯვებით დაასრულა და 14-ჯერ მოახერხა ბურთის დაბრუნება. საგულისხმოა, რომ კამავინგას თამაშის წესები არ დაურღვევია, მის წინააღმდეგ კი, 8-ჯერ დაჯარიმდა „როხიბლანკო.“