სამეფო კლუბმა 2023 წელი არასახარბიელოდ დაიწყო. პრიმერა დივიზიონში ლიდერობის დაკარგვის (მარცხი „ვილიარეალთან“) შემდეგ, „რეალმა“ ქვეყნის სუპერ თასის ფინალიც დათმო.

ანჩელოტის შემადგენლობის უმრავლესობა ფიზიკური კონდიციებით ვერ დაიკვეხნის, რასაც ემატება 4 ტრავმირებული ფეხბურთელი - ალაბა, ჩუამენი, ლუკას ვასკესი და კარვახალი.

ესპანურ პრესაში ფიქრობენ, რომ აღნიშნული სიტუაციიდან თავის დაწღევის ერთ-ერთი გასაღები, შესაძლებელია „ბლანკოსის“ მეორე გუნდში იდოს. მიმდინარე სეზონში რაულის დარიგებული კოლექტივი დიდებულად ასპარეზობს რანგით მესამე დივიზონში. ისინი სატურნირო ცხრილში მე-3 პოზიციას იკავებენ და უფრო მაღალ დივიზიონში დაწინაურების შესანიშნავ შანსს ფლობენ.

„ელ კაპიტანოს“ განკარგულებაში კი, არიან მოთამაშეები, რომელთაც შედეგის მოტანა შეუძლიათ იტალიელი სპეციალისტისთვისაც.

სერხიო არიბასი „კასტილიას“ ბომბარდირია 9 გოლით. მისი დებიუტი „რეალის“ პირველ გუნდში 2020 წელს, ზიდანის პირობებში შედგა და საერთო ჯამში, 11 წუთი აქვს გატარებული 3 სეზონის განმავლობაში. მას თავის გამოჩენის საშუალება 2 კვირის წინ, „კასერენიოს“ წინააღმდეგაც მიეცა. Olocip-ის (ხელოვნური ინტელექტი) ინფორმაციით, ის საუკეთესოა „თეთრების“ რიგებში.

დაცვის მარჯვენა ფლანგზე არსებული სიცარიელის შევსება ვინისიუს ტობიასს ძალუძს. 18 წლის ბრაზილიელი, რომელიც კლუბმა „შახტარიდან“ ინათხოვრა, შესანიშნავი თვისებებით გამოირჩევა. კარვახალისა და ლუკას ვასკესის ტრავმების ფონზე, ის აუცილებლად იმსახურებს შანსს.

რაფა მარინი „კასტილიის“ დაცვის ხაზის ნამდვილი ბურჯია. 1.91 სიმაღლის ფეხბურთელი რაულის წარმატების გარანტია. მას ანჩელოტიმ განვლილ სეზონში „ჩელსისთან“ მატჩისთვის უხმო, მაგრამ თამაშის საშუალება არ მისცემია.

საყრდენის ზონის გაძლიერებაზე პასუხისმგებლობის აღება მარტიო მარტინის მოვალეობაა. 18 წლის მოთამაშე უფროსს მადრიდისტებს გაჰყვა რიადში. კარლიტო მის შესაძლებლობებს კარგად იცნობს.

და ბოლოს, თავდასხმაში გონსალესს 2 გამორჩეული ბიჭი ჰყავს, იკერ ბრავოსა და ალვარო როდიგესის სახით. ეს უკანასკნელი საკმაოდ ტანმაღალი ფორვარდია და ამჟამად კოლუმბიაში იმყოფება, სადაც ურუგვაის ნაკრებთან ერთად 20 წლამდელთა კოპ ამერიკაზე იღებს მონაწილეობას.