როგორც იცით, 1-დან 11 თებერვლის ჩათვლით, მაროკო მსოფლიოს საკლუბო ჩემპიონატს უმასპინძლებს.

13 იანვარს, 15:00 საათზე (თბ. დროით), ქალაქ რაბათში მოახლოვებული ტურნირის კენჭისყრა გაიმართება, რომელშიც 7 კლუბი მიიღებს მონაწილეობას.

ფორმატის მიხედვით, 1-ელ თებერვალს, ერთმანეთს დაუპირისპირდებიან „ალ აჰლი“ და „ოკლენდ სითი.“ მათ შორის გამარჯვებული მეოთხედფინალურ სტადიაზე „სიეტლ საუნდერსთან,“ „ვიდად კასაბლანკასთან“ და „ალ ჰილალთან“ ერთად იბრძოლებს ნახევარფინალური საგზურისათვის, სადაც უკვე „რეალი“ და „ფლამენგო“ დაელოდებიან მოწინააღმდეგეს.

ხვალინდელი წილისყრით „ბლანკოსის“ პოტენციური მეტოქე გაირკვევა. ანჩელოტის გუნდი 8 თებერვლიდან ჩაერთვება გათამაშებაში.