ესპანეთის სუპერ თასის ნახევარფინალურ მატჩში კარლო ანჩელოტის თავსატეხი არ აკლდა.

„ვალენსიასთან“ შეხვედრის მსვლელობისას, იტალიელ დამრიგებელს 3 იძულებითი ცვლილებების განხორციელება მოუხდა. შესვენების შემდეგ მოედანზე არ დაბრუნებულა ედუარდო კამავინგა. ამ უკანასკნელს მუხლზე ჰქონდა დისკომფორტი.

68-ე წუთზე, მეტოქეს ორთაბრძოლის შედეგად, კოჭი აიტკივა ლუკას ვასკესმა, რომელმაც თამაშის გაგრძელება ვეღარ შეძლო.

ესპანელის მსგავსად ვერც მილიტაომ დაასრულა პაექრობა. ის 74-ე წუთზე გაეშურა სათადარიგო სკამისკენ. ამ უკანასკნელმა რამდენიმე წუთით ადრე, მეტოქის მიერ გასროლილ ბურთს თავი დაუხვედრა და შესაბამისად, ძლიერი დარტყმა მიიღო.

არსებული მომენტისათვის უცნობია, მწყობრში იქნებიან თუ არა ისინი ფინალური შერკინებისათვის, რომელიც 15 იანვარს, 23:00 საათზე (თბ. დროით) აირებს სტარტს.

შეგახსენებთ, რომ „რეალის“ ლაზარეთში უკვე იმყოფება 2 ფეხბურთელი, დავიდ ალაბასა და ორელიენ ჩუამენის სახით.