მიმდინარე ფორმაციის „რეალში“ დაცვის ხაზი უმაღლესი დონის ფეხბურთელებითაა დაკომპლექტებული.

მილიტაოსა და ალაბას ტანდემს, რომელმაც დიდი წვლილი შეიტანა განვლილი სეზონის ტრიუმფში, ზაფხულში, ანტონიო რუდიგერიც დაემატა. გერმანელმა მოთამაშემ „ჩელსისა“ და ეროვნული ნაკრების რიგებში ბევრჯერ დაამტკიცა, თუ რა შესაძლებლობების მატარებელია.

არსებული მომენტისათვის, საქმეში ყველაზე მეტი დრო ავსტრიელმა გაატარა - 1716 წუთი. აღნიშნულ კომპონენტში მეორე ადგილს იკავებს ბრაზილიელი (1346 წ.), ხოლო მესამეს, შესაბამისად, რუდიგერი (1135), თუმცა ამ უკანასკნელს, მეტწილად, სათადარიგონდ უწევს შეხვედრის მიმდინარეობაში ჩართვა, ან ტრავმირებული თანაგუნდელის შეცვლა. ერთი სიტყვით, ტონი ძირითადი შემადგენლობის წევრად არ ითვლება.

ანჩელოტისა და მისი ვაჟის სურვილია, რუდიგერი უფრო მეტად დატვირთონ და ამისათვის, გარკვეულ ცვლილებებს გეგმავენ. კერძოდ, კურტუას წინ, ის სწორედ მილიტაოს უნდა შეუწყვილდეს, ხოლო დავიდმა მარცხენა ფრთაზე გადაინაცვლოს, სადაც გაატარა კარიერის დიდი ნაწილი. გავრცელებული ინფორმაციით, მოვლენების ამგვარი განვითარებით უკმაყოფილი იქნება ალაბა. მან მწვრთნელს უკვე განუცხადა, რომ ე.წ. CB-ის პოზიციაზე გაცილებით კომფორტულად გრძნობს თავს.

რა თქმა უნდა, გადამწყვეტი სიტყვა იტალიელ დამრიგებელზე იქნება.