სამეფო კლუბის განვლილი ვარჯიში მეტად განსაკუთრებული გამოდგა. „თეთრებმა“ შესანიშნავ გარემოში დაასრულეს სათასო პაექრობისთვის მზადების პროცესი.

კარლო ანჩელოტის გადაწყვეტილებით, ფეხბურთელებმა „ალფრედო დი სტეფანოზე“ გამართეს ღია სესია, სადაც ასობით გულშემატკივარს მიეცა თვალ-ყურის მიდევნების საშუალება. ისინი დიდი სიამოვნებითა და ემოციებით უცქერდნენ საყვარელი ფეხბურთელების მიერ სხვადასხვა დავალების შესრულებას.

მოთამაშეებმა ფიზიკურ-ტაქტიკური სავარჯიშოების შემდეგ, რამდენიმე მინი მატჩიც გამართეს. სტადიონზე შეკრებილმა ქომაგებმა მადრიდელების მხრიდან ტექნიკური არსენალის დემონსტრირება და არა ერთი ლამაზი გოლი იხილეს.

კურტუა, კარვახალი და მარიანო მოედანზე არ გამოჩენილან. სამივე დახურულ კარს მიღმა ირჯებოდა.