„რეალში“ მომავალი სატრანსფერო ფანჯრისთვის უკვე გეგმებს აწყობენ.

მადრიდელებმა განვლილ ზაფხულს გუნდის დატოვების საშუალება მისცეს მიგელ გუტიერესს (მისი უფლების მხოლოდ 50% გაასხვისეს). 21 წლის მარცხენა მცველი სათამაშოდ „ჟირონაში“ გადაბარგდა 4 მლნ. ევროს სანაცვლოდ.

აღსანიშნავია, რომ ახალგაზრდა ფეხბურთელმა მიჩელის დაქვემდებარებაში დიდი პროგრესი განიცადა და გუნდის ერთ-ერთ ლიდერადაც ჩამოყალიბდა. პრიმერა დივიზიონის 14 მატჩიდან 11 სასტარტო შემადგენლობაში დაიწყო და 3 ასისტიც ჩაიწერა აქტივში. მან 30 ოქტომბერს „სანტიაგო ბერნაბეუზეც“ იასპარეზა, როდესაც მადრიდელები 1-1 დაუზავდნენ მეტოქეს.

ამჟამინდელი მონაცემებით, მიგელი საშუალოდ 1.28 ვარდნას ასრულებს 90 წუთის განმავლობაში და 5.26-ჯერ იბრუნებს ბურთს, რაც უკეთესია ალაბასა და მენდის მაჩვენებლზე.

ამ ყველაფრის გათვალისწინებით, „რეალში“ უკვე ალაპარაკდნენ კანტერანოს დაბრუნებაზე.