მსოფლიოს ჩემპიონატის ფინალამდე 48 საათით ადრე, კვლავ უცნობია, გაემგზავრება თუ არა კარიმ ბენზემა დოჰაში თანამემამულეების საგულშემატკივროდ.

Libertad Digital-ი მეტად სკანდალურ ინფორმაციას ავრცელებს. კერძოდ, „რეალის“ თავდამსხმელს მიუხედავად მიღებული ტრავმისა, ყატარის დატოვება არ სურდა, თუმცა დიდიე დეშამმა აიძულა, რომ ესპანეთში დაბრუნებულიყო. „სამწუხაროა, რომ შენ მოგიწევს წასვლა“ - უთხრა მთავარმა მწვრთნელმა მოთამაშეს, რომელმაც დამრიგებლის აღნიშნული სიტყვების შემდეგ უსარგებლოდ იგრძნო თავი და ბარგი ჩაალაგა.

ის, რომ ბენზემასა და დეშამს შორის კარგი ურთიერთობა არ სუფევს, ადასტურებს გავლენიანი L'Équipe-ც. მათ შორის შავმა კატამ მაშინ გაირბინა, როდესაც გოლეადორმა „ოქრო ბურთის“ დაჯილდოვების ცერემონიაზე, სამადლობელ სიტყვაში არაფერი თქვა „მამლების“ მესაჭეზე.

ამ ყველაფრის დასტურია დეშამის რეაქცია, როდესაც ჟურნალისტმა ჰკითხა რას ფიქრობდა ფინალისათვის ბენზემას ნაკრებში დაბრუნებაზე (იხ.ვიდეო).