როგორც იცით, მსოფლიოს 2022 წლის ჩემპიონატის გამო, „ფიფას“ 2022 წლის საკლუბო მუნდიალი, დეკემბრის ნაცვლად თებერვალში ჩატარდება.

კონტინენტების საკლუბო ჩემპიონატების გამარჯვებული გუნდები მაროკოში, 1-დან 11 თებერვლის ჩათვლით იბრძოლებენ ოქროს მედლებისათვის. სამეფო კლუბი კი, გათამაშების მიმდინარეობაში 6 თებერვალს, ნახევარფინალური სტადიიდან ჩაერთვება.

მომავალ ტურნირზე „რეალის“ გარდა კიდევ 6 გუნდი მიიღებს მონაწილეობას, თუმცა ამ ეტაპისათვის, მხოლოდ 4 კოლექტივის ვინაობაა ცნობილი: „ფლამენგო,“ „სიეტლ საუნდერსი,“ „ვიდად კასაბლანკა“ და „ოუკლენდ სითი.“

საგულისხმოა, რომ „ბლანკოსმა“ ერთხელ უკვე დაასრულა ტრიუმფით მაროკოში გამართული მსოფლიოს საკლუბო ჩემპიონატი. 2014 წელს, ანჩელოტის შეგირდებმა ფინალურ შეხვედრაში 2 უპასუხო გოლი გაუტანეს არგენტინულ „სან ლორენცოს.“

„რეალმა“ აღნიშნული თასი 2016, 2017 და 2018 წლებშიც აღმართა.