მსოფლიოს ჩემპიონატის საწყის შეხვედრაში გაგორებული ყაიმის შემდეგ, მოქმედმა ვიცე ჩემპიონებმა მნიშვნელოვანი გამარჯვება მოიპოვეს კანადელების წინააღმდეგ.

შეხვედრა დალიჩის შეგირდებისათვის არასასიამოვნოდ დაიწყო, ვინაიდან ჩრდილო ამერიკელებმა დებიუტშივე მოახერხეს ანგარიშის გახსნა, თუმცა შემდეგ ევროპელებისაგან 4 უპასუხო გოლი მიიღეს. ლუკა მოდრიჩმა 86 წუთის განმავლობაში უკაპიტნა თანამემაულეებს. 37 წლის ნახევარმცველმა საკმაოდ მაღალ დონეზე იასპარეზა. მოედნის დატოვებამდე რამდენიმე წუთით ადრე კი, გაფრთხილება მიიღო.

მოდრიჩის მონაგარი შემდეგნაირად გამოიყურება: 48 გადაცემა (86% სიზუსტით), 2 გადამწყვეტი პასი, 5 ჩაწოდება, 3 ვარდნა და 1 დრიბლინგი.

ხორვატია: ლივაკოვიჩი; იურანოვიჩი, ლოვრენი, გვარდიოლი, სოსა; მოდრიჩი (პაშალიჩი 86), ბროზოვიჩი, კოვაჩიჩი (მაიერი 86); კრამარიჩი (ვლაშიჩი 72), ლივაია (პეტკოვიჩი 60), პერიშიჩი (ორშიჩი 86)
მწვრთნელი: ზლატკო დალიჩი

კანადა: ბორიანი; ჯონსტონი, ვიტორია, მილერი, ლარიეა (ჰოილეტი 62); ბიუკენენი, ჰატჩინსონი (ადეკუგბე 72), ეუშტაკიუ (კონე 46), დევისი; ლარინი (ოსორიო 46), დევიდი (კავალინი 72)
მწვრთნელი: ჯონ ჰერდმანი

გოლები: 0:1 დევისი (2), 1:1 კრამარიჩი (36), 2:1 ლივაია (44), 3:1 კრამარიჩი (70), 4:1 მაიერი (90)

F ჯგუფში ბოლო ტურის წინ მეტად საინტერესო სურათია. ხორვატიასა და მაროკოს 4-4 ქულა აქვთ, ბელგიას 3, ხოლო კანადას 0. მერვედფინალისტების ვინაობა 1-ელ დეკემბერს გაირკვევა, როდესაც ხორვატები „წითელ ეშმაკებს“ შეერკინებიან, ხოლო აფრიკელები კანადელებს.