გუშინ, მსოფლიოს ჩემპიონატის ჯგუფური ეტაპის 1-ლი ტური დასრულდა.

როგორც იცით, მიმდინარე მუნდიალზე „რეალის“ ლეგიონს 12 ფეხბურთელი წარმოადგენს. მართალია, ამ ეტაპისათვის უკლებლივ ყველას არ მისცემია თავის გამოჩენის საშუალება, თუმცა უმრავლესობამ საკმაოდ მაღალ დონეზე წარმოაჩინა შესაძლებლობები.

საფრანგეთი 4-1 ავსტრალია (ჩუამენი და კამავინგა)

ოურელინმა 77 წუთი გაატარა საქმეში და ნახევარდაცვის ხაზს რაბიოსთან ერთად აკონტროლებდა. ახალგაზრდა ფეხბურთელი მეტწილად თავდაცვითი ფუნქციების შესრულებით იყო დაკავებული. Le Figaro-მ მისი ასპარეზობა შემდეგნაირად შეაფასა - „თავდაუზოგავად მომუშავე, ყურადღებიანი, ფოკუსირებული და პოზიციის კარგად შემრჩევი.“ კამავინგას ავსტრალიელებთან თავის გამოჩენის შანსი არ მისცემია.

ხორვატია 0-0 მაროკო (მოდრიჩი)

დალიჩის გუნდის თამაში მოდრიჩის რითმით წარიმართა. „ათიანს“ კლუბისგან განსხვავებით, ნაკრებში სხვა სივრცეების ათვისება მოუწია. ლუკა მოედანზე 90 წუთის მანძილზე ირჯებოდა, რა პერიოდის განმავლობაშიც ყველაზე მეტჯერ ჩააგდო ბურთი მეტოქის საჯარიმოში (9) და 29 შემთხვევაში გაარღვია მათი დაცვითი ხაზი. „ოქროს ბურთის“ მფლობელი ფეხბურთელი აღნიშნული დაპირისპირების MVP გახდა.

გერმანია 1-2 იაპონია (რუდიგერი)

ბუნდეს ნაკრების გახსნით პაექრობაში ტონის შლოტერბეკი შეუწყვილდა. ფლიკის სათამაშო სტილიდან გამომდინარე, „რეალის“ მცველს არაერთგზის მოუწია თამაშში ჩართვა. მან მოწინააღმდეგის კარის მიმართულებით 3 დარტყმაც განახორციელა, ხოლო იაპონელების 1-ლი გოლის დროს კი, მეტის გაკეთება შეეძლო. რუდიგერმა შეუცვლელად იასპარეზა.

ესპანეთი 7-0 კოსტა რიკა (ასენსიო და კარვახალი)

მალიორკელმა შემტევმა „ფურია როხას“ გოლების ფესტივალში საკუთარი წვლილი შეიტანა. ასენსიოს განვლილი მატჩის რიგით მეორე შედეგიანი დარტყმა ჩაიწერა აქტივში და ამის გარდა, 4-ჯერ გაისროლა ბურთი კეილორ ნავასის კარის მიმართულებით. ლუის ენრიკემ მას დიდი ნდობა გამოუცხადა და „ცხრიანის“ პოზიციაზე გაამწესა. მარკომ 69 წუთის განმავლობაში იბურთავა, ხოლო დანიელ კარვახალი სათადარიგოდან უყურებდა შეხვედრის მიმდინარეობას.

ბელგია 1-0 კანადა (კურტუა და აზარი)

10 წუთი საკმარისი გამოდგა კურტუასათვის, რომ დაემტკიცებინა, თუ რატომ დაასახელეს განვლილი სეზონის საუკეთესო მეკარედ. ტიბო კატარის მუნდიალზე უფრო გამორჩეულ დებიუტს ვერც ინატრებდა - მოგერიებული პენალტი და კარის მშრალად შენახვა. რაც შეეხება აზარს, მწვრთნელმას მას მხოლოდ 62 მისცა. ედენმა მაღალ დონეზე იასპარეზა, თუმცა ის ტემპის ნაკლებობას განიცდიდა.

ურუგვაი 0-0 სამხრეთ კორეა (ვალვერდე)

„ელ ფალკონი“ ახლოს იყო გამარჯვებულის გოლი ჩაეწერა აქტივში, თუმცა 89-ე წუთზე აზიელების კარი ძელმა იხსნა. ფედერიკომ შეუცვლელად იბურთავა და MVP-ის წოდებაც დაიბევა.

ბრაზილია 2-0 სერბეთი (ვინისიუსი, როდრიგო და მილიტაო)

ვინიმ „სელესაოს“ ორივე გოლში მიიღო მონაწილეობა. თავდაპირველად, მის დარტყმულს, რომელიც მეკარემ მოიგერია, დაამატა რიჩარლისონმა, შემდეგ კი, მოდრიჩის სტილში ფეხზე დაასვა ბურთი იგივე რიჩარლისონს და ამ უკანასკნელმაც შესანიშნავად იმოქმედა. 75-ე წუთზე ვინისიუსმა ასპარეზი დაუთმო როდრიგოს. „სან პაულოს“ მკვიდრმაც სცადა შედეგიანი დარტყმის განხორციელება, თუმცა მისი გასროლილი მიზანს აცდა. ედერ მილიტაო სათადარიგო სკამიდან არ წამომდგარა.