ბოლო პერიოდის განმავლობაში კრიშტიანუ რონალდუს მისამართით დიდი კრიტიკა ისმის.

აღნიშნულ ფაქტს გამოეხმაურა „რეალის“ ყოფილი განაპირა მცველი ფაბიუ კოენტრაუ.

„ის რაც ხდება, არის სირცხვილი. ადამიანი, რომელიც მთელი ცხოვრების განმავლობაში ფეხბურთს ემსახურება და მის სახელს უამრავი მიღწევა უკავშირდება, არ იმსახურებს მსგავსს, თუნდაც არსებული მომენტისათვის ვერ იყოს მოწოდების სიმაღლეზე. მასთან ერთად გარკვეული პერიოდის განმავლობაში მომიწია თამაში და ვიცი ყველაფერი.“

„ვფიქრობ, რონალდუს არავისთვის აქვს დასამტკიცებელი არაფერი. ჩვენ ვსაუბრობთ მოთამაშეზე, რომელმაც კარიერის მანძილზე 700 გოლის გატანა მოახერხა. დღესაც რომ ასპარეზობდეს „რეალში,“ 60 გოლს შეაგდებდა. ცხადია, დიდი პატივისცემა ბენზემას. ამ უკანასკნელმა განვლილ სეზონში 40 გოლს მოუყარა თავი, თუმცა ყველამ ვიცით, კრიშტიანუ სხვა დონეზე დგას. „მანჩესტერში“ სხვანაირად განვითარდა მოვლენები და ამაში წვლილი მიუძღვის ირგვლივ მყოფებს.“

„რონალდუს ბევრი ისეთი ექს-მოთამაშე კიცხავს, რომლებსაც არაფერი გაუკეთებიათ ფეხბურთში ყოფნის დროს და ახლა უბრალოდ ქულებს იწერენ. ვინც მას აკრიტიკებს არის ნეხვი.“