ის, რომ ფეხბურთში ფინანსები მთავარი არ არის, ახალგაზრდა ნახევარმცველმა კიდევ ერთხელ დაადასტურა.

როგორც იცით, ჩუამენის პოტენციალით მხოლოდ „რეალი“ არ ყოფილა დაინტერესებული. მადრიდელებს სერიოზული კონკურენტები ჰყავდათ „პსჟ“-სა და „ლივერპულის“ სახით. პირველ შემთხვევაში ფრანგის გადაბირების პროცესში მისივე თანაგუნდელი მბაპე იყო ჩართული, ხოლო მეორე მხარეს, უშუალოდ იურგენ კლოპი ცდილობდა ფონს გასვლას.

„მარკას“ მიერ მოპოვებული ინფორმაციით, პარიზული გრანდი „მონაკოს“ ამომავალ ვარსკვლავს, არც მეტი არც ნაკლები, 12 მილიონ ევროს სთავაზობდა ყოველწლიური ჰონორარის სახით, თუმცა ოურელინმა არჩევანი სამეფო კლუბზე შეაჩერა, სადაც ორჯერ ნაკლები შემოსავალი ექნება (დაახლოებით 6-7 მილიონის ფარგლებში). ამ ქმედებით მან ყველას დაანახა, რომ ფულზე მნიშვნელოვანი ბავშვობის ოცნების ახდენა და პლანეტის საუკეთესო გუნდში ასპარეზობაა.