„რეალის“ პრეზიდენტმა ლა ლიგის პრეზიდენტი, ხავიერ ტებასი და „უეფა“ გააკრიტიკა....

„ჩემსა და ხავიერ ტებასს შორის ურთიერთობა ათწლეულებს მოითვლის, ყოველთვის პატივს ვცემდით ერთმანეთს და ვიზიარებდით პოზიციებს, მაგრამ როდესაც მოვისმინე, რომ სატელევიზიო უფლებები 50 წლით რაღაც თანხის გამო უნდა დაგვეთმო, მაშინვე სასამართლო დავა დავიწყე, ვინაიდან მივხვდი, რომ მოლაპარაკებას აზრი არ ჰქონდა. ეს იყო გარიგება, რომელიც აზიანებდა აბსოლუტურად ყველა კლუბის ინტერესს. აქ არ აქვს მნიშვნელობა მოკლევადიან პერსპექტივებს, ჩვენ წინ უნდა ვიყუროთ და ისეთი ნაბიჯები არ გადავდგათ, რომელიც არამხოლოდ კლუბებს, არამედ მთელ ლა ლიგას დააზიანებს.“

„საბოლოო ჯამში ვთვლი, რომ მიზანს მივაღწიეთ და შეთანხმება არ შედგა. ჩემი აზრით, ბრძოლას ნამდვილად ჰქონდა აზრი და ამ იდეას პერსპექტივა აღარ აქვს.“

„რაც შეეხება „უეფას“. მე ვნახე ჩეფერინი, ფინალის დღეს შეხვედრა შედგა და ახალი ბერნაბეუს მაკეტიც ვუსახსოვრე, ჩვენ ბევრი არ გვისაუბრია, თუმცა ყველაფერი ნორმის ფარგლებში ჯდებოდა.“

„მე „უეფასთან“ შეკითხვები მაქვს, რომელზეც პასუხის გაცემა აუცილებელია. რატომ ჩაინიშნა ფინალი პარიზში? ამას გარკვეული მიზეზები აქვს და ორგანიზაციამ პასუხი უნდა გაგვცეს.“

„ჩვენ არასდროს შეგვშინებია ჩემპიონთა ლიგიდან მოკვეთის, ვინაიდან გვჯერა, რომ მართლები ვართ და სასამართლო პროცესებიც ჩვენს სასიკეთოდ წარიმართება.“

„სწორედ ეს არის განსხვავება მონოპოლიური ხასიათის „უეფასა“ და ჩვენს შორის, ვისაც სუპერლიგის დაარსება გვსურს და გვჯერა ამ იდეის.“