„რეალის“ ნახევარმცველს თავის მართლება მოუწია.

ურუგვაისა და პანამას ამხანაგური შეხვედრის დაწყებამდე, ქვეყნის პრეზიდენტი ლუის ალბრეტო ლაკალიე მოედანზე ჩავიდა და ფეხბურთელებს შეხვდა. საერთო ფოტოს გადაღების ეპიზოდში, ფედერიკო კადრში არ მოხვდა, ვინაიდან ზუსტად აღნიშნულ მომენტში გეტრების გასწორება გადაწყვიტა. შესაბამისი ვიდეო კადრების გავრცელების შემდეგ, ამ ამბავს გარკვეული გამოხმაურება მოჰყვა და გულშემატკივრებმა ვალვერდე პირველი პირის უპატივცემულობაში დაანაშაულეს.

მოთამაშემ მოგვიანებით „თვითერის“ საშუალებით განმარტებაც გააკეთა: „თქვენ სერიოზულად ფიქრობთ, რომ ეს სპეციალურად გავაკეთე? მე დავიხარე, რათა გამესწორებინა გეტრები. მე ვთამაშობ ფეხბურთს და იმას ნუ მომაწერთ, რაც არ არსებობს.“