სამეფო კლუბის ფეხბურთელები თავიანთი ქვეყნის ღირსებას იცავენ.

„სელესაომ“ ამხანაგურ დაპირისპირებაში მინიმალური ანგარიშით სძლია იაპონიას (0-1). ედერ მილიტაო, კაზემირო და ვინისიუსი სასტარტო შემადგენლობიდან ირჯებოდნენ. მცველმა მოედანზე 90 წუთი გაატარა, ხოლო დანარჩენები მეორე ტაიმში შეცვალეს (შესაბამისად, 63-ე და 83-ე წუთებზე). როდრიგო მატჩის განაცხადში არ ყოფილა. ტიტეს დარიგებულებმა სანაკრებო ბატალიები დაასრულეს.

„უეფას“ ერთა ლიგის მეორე ტურის პაექრობაში, ავსტრია საშინაო მოედანზე დამარცხდა დანიასთან (1-2). დავიდ ალაბამ 90 წუთის განმავლობაში იბურთავა.

სპლიტში ერთმანეთს ხორვატიისა და საფრანგეთის გუნდები შეერკინენ. განვლილი მუნდიალის ფინალისტებმა ტაბლოზე შედეგიანი ყაიმი დააფიქსირეს (1-1). აღსანიშნავია, რომ მოდრიჩმა 79 წუთის განმავლობაში უკაპიტნა შემადგენლობას, ბენზემას კი დასვენების საშუალება მიეცა.

საფრანგეთის 21 წლამდელთა ნაკრებმა ერევანში დამაჯერებელი გამარჯვება მოიპოვა სომეხ თანატოლებთან (1-4). ედი კამავინგამ შეუცვლელად იასპარეზა.