„რეალი“ ზაფხულში რამდენიმე ტრანსფერს განახორციელებს, მაგრამ მადრიდელები არ ჩქარობენ.

კლუბის მიზანია ისეთი მოთამაშეების მოძიება, რომლებმაც იციან და გაიგებენ, თუ რას ნიშნავს „ბლანკოსის“ მაისურის მორგება და მისი ღირსების დაცვა. მბაპეს თემით „თეთრებმა“ კარგი გაკვეთილი მიიღეს. ახლა მათ იციან, რომ სიტყვაზე აღარ უნდა ენდონ ახალგაზრდა კაპრიზ მოთამაშეებს.

არსებული მომენტისათვის კლუბი მთლიანად კონცენტრირებულია ჩემპიონთა ლიგის კარს მომდგარ ფინალზე. ფლორენტინო პერესი მატჩამდე 2 დღის განმავლობაში გუნდთან ერთად იქნება, თუმცა მომდევნო პერიოდის განმავლობაში სატრანსფერო საკითხების განხილვა არ მოხდება. ის კარლო ანჩელოტის მადრიდში დაბრუნების შემდეგ, შვებულებაში გასვლამდე შეხვდება და სამომავლო გეგმებზეც ისაუბრებენ.

ანტონიო რუდიგერის საკითხის გადაწყვეტის პარალელურად, „რეალის“ მიზანია ნახევარმცველისა და თავდამსხმელის დამატება. მადრიდელები უკვე მუშაობენ ოურელიენ ჩუამენის გაფორმებაზე.

პრე-სეზონის განმავლობაში ანჩელოტის განკარგულებაში იჯარიდან დაბრუნებული რამდენიმე ფეხბურთელიც იქნება, თუმცა არა ოდრიოსოლა, რეინიერი, კუბო, მაიორალი და დიასი, ვინაიდან იტალიელი მათი გარჯით უკმაყოფილოა.