ბოლო საათების განმავლობაში კილიან მბაპესთან დაკავშირებით არა ერთგვაროვანი ინფორმაციები ვრცელდება, რაც „რეალისათვის“ სახარბიელო სულაც არ არის.

ჟურნალისტი ხოსეპ პედრეროლი ფრანგ ფეხბურთელის ირგვლივ შექმნილ ვითარებას გამოეხმაურა: „სექტემბერში მბაპესთან ყველაფერი შეთანხმებული იყო, მაგრამ დაახლოებით 1 კვირის განმავლობაში, ის არ პასუხობს „რეალის“ ზარებსა და შეტყობინებებს. რა თქმა უნდა, აღნიშნული ფაქტით შეშფოთებულნი არიან მადრიდში. ამასთანავე, „ბლანკოსში“ ვერ იგებენ მოთამაშის გადაწყვეტილებას განცხადების გაკეთების თარიღთან დაკავშირებით. მათი მოლაპარაკების თანახმად, ეს ყოველივე ჩემპიონთა ლიგის ფინალის დასრულების შემდეგ უნდა მომხდარიყო. გამოდის, რომ მან გეგმა დაარღვია.“

„არ ვიცი, ახალგაზრდა შემტევი დარჩება თუ დატოვებს კლუბს, თუმცა სიტუაცია იმედისმომცემი არ არის. ჩემი აზრით, არსებული მომენტისათვის, მისი გაფორმება ძალიან რთულია. თუ ის მომავალთან დაკავშირებით შაბათს თამაშის შემდეგ ისაუბრებს, ესეიგი „პსჟ“-სთან აპირებს კონტრაქტის გახანგრძლივებას. კვირას კი ინტერვიუს დროს დეტალურად ახსნის ყველაფერს. პროცესებს პესიმისტურად ვუყურებ, მაგრამ იმედია, რომ ვცდები.“