34 წლის ფრანგი თავდამსხმელი ძალიან ახლოს არის ისტორიის მორიგი ფურცლის გადაწერასთან.

ბენზემას მადრიდულ დერბიში დასვენების საშუალება მიეცა და შესაბამისად, მისმა გამოწვევამ 1 ტურით გადაიწია.

მიმდინარე სეზონის დაწყებამდე, კარიმ ბენზემა კლუბის ყველა დროის საუკეთესო ბომბარდირთა დავაში 11 გოლით ჩამორჩებოდა სანტილიანას, 29-ით დი სტეფანოს და 44-ით რაულს. ახლა უკვე, როდესაც ზაფხულის არდადეგებამდე მხოლოდ 5 მატჩია დარჩენილი, ფრანგს უკან ჰყავს მოტოვებული ლეგენდარული ფეხბურთელები, ხოლო დიად „ელ კაპიტანომდე“ მხოლოდ 1 შედეგიანი დარტყმაღა აშორებს.

„ცხრიანს“ დიდებული შანსი აქვს „ლევანტესთან“ შეხვედრაში გაიმეორეს ან მოხსნას რაულ გონსალესის 323 გოლიანი მიღწევა და „ბლანკოსის“ არსებობის განმავლობაში მე-2 საუკეთესო გოლეადორი გახდეს. პირველზე, რა თქმა უნდა, კრიშტიანუ რონალდუა არანორმალური ციფრებით - 438 შეხვედრაში 450 ბურთი.

წლეულს, ბენზემა უბრალოდ საოცარ სეზონს ატარებს. მან 43 პაექრობაში მიიღო მონაწილეობა და მეტოქეების კარიც ამდენჯერვე აიღო. ის საუკეთესო მეგოლეა, როგორც პრიმერა დივიზიონის, ასევე ჩემპიონთა ლიგის მასშტაბით, შესაბამისად, 26 და 15 გოლი. ფეხბურთელის მიზანია, რომ ლა ლიგაზე 30 გოლიანი ნიშნული დააფიქსიროს.

„რეალის“ ყველა დროის საუკეთესო ბომბარდირთა ათეული:

1) რონალდუ - 450 გოლი;
2) რაული - 323;
3) ბენზემა - 322;
4) დი სტეფანო - 308;
5) სანტილიანა - 290;
6) პუშკაში - 242;
7) უგო სანჩესი - 208;
8) ხენტო - 182;
9) პირი - 172;
10) ბუტრაგენიო - 171.