კარლო ანჩელოტიმ „ლევანტესთან“ მატჩამდე პრესკონფერენცია გამართა.

„მომავალ პაექრობაში კარგად უნდა ვითამაშოთ. ჩვენი მიზანია რიტმის შენარჩუნება და გამარჯვების მოპოვება.“

„ჰალანდი „სიტიში?“ მსგავს თემებზე საუბარი არ მსურს. ერლინგი დიდებული ფეხბურთელია, რომელიც შესანიშნავ კლუბში გადაბარგდა. მე სიამოვნებას ვიღებ საკუთარი შეგირდებით, რომლებიც ჩემპიონთა ლიგის მორიგ ფინალში მიიღებენ მონაწილეობას.“

„რუდიგერი და მბაპე „რეალში?“ სამომავლო გეგმებთან დაკავშირებით სეზონის დასრულების შემდეგ ვისაუბრებთ, ახლა სათანადო დრო არ არის.“

„სატრანსფერო საკითხებზე სასაუბროდ არ მოვსულვარ. მე მხოლოდ ხვალინდელ შეხვედრაზე მინდა კომენტარის გაკეთება. მაგალითად, კურტუა, ვინისიუსი და ბენზემა დაგვიბრუნდნენ... “

„ვინის პოზიცია მბაპეს მოსვლის შემთხვევაში? ბრაზილიელი ფეხბურთელი კომფორტულად გრძნობს თავს მარცხენა ფრთაზე. მას ბურთის გარეშე თამაშის გაუმჯობესება მართებს. ამასთანავე, მაქსიმალურად უნდა გამოიყენოს თავისი სისწრაფე.“

„არსებული ეტაპისათვის „ლივერპულთან“ შეხვედრაზე არ ვფიქრობთ. წინ „ლევანტესთან“ ორთაბრძოლა გვაქვს ჩასატარებელი, სადაც იმ ფეხბურთელებს მიეცემათ შანსი, რომლებმაც მადრიდული დერბი გამოტოვეს. კვირას კიდევ ერთ პაექრობა გველოდება. ვცდილობთ, შემადგენლობის ყველა წევრის მწყობრში ჩაყენებას და დიდი ალბათობით, ბოლო ტურისთვის ამას მივაღწევთ.“

„პინტუსი დიდი პროფესიონალია, რომელიც პატარა დეტალებსაც სათანადო ყურადღებას აქცევს. ის ერთ-ერთი საუკეთესოა, ვისაც ამ სფეროში შევხვედრივარ. ანტონიოს მხრებზე უზარმაზი გამოცდილებაა მსგავსი ტიპის მატჩებისათვის ფეხბურთელების მომზადების ასპექტში. ჩვენ ფიზიკური და ტენიკურ-ტაქტიკური სამუშაოს ნაყოფიერი შერწყმა მოვახერხეთ. ის საკმაოდ თავმდაბალი ადამიანია და ჩვენს შორის მეგობრული ურთიერთობა სუფევს.“

„მიმდინარე პრიმერა დივიზიონი ფანტასტიკური გამოდგა. გუნდმა სრულიად დამსახურებულად მოიპოვა ჩემპიონობა. „რეალი“ სხვა კლუბებზე დამაჯერებელი და ეფექტური გამოდგა. აღნიშნული პერიოდის განმავლობაში მხოლოდ 2 გართულებას გადავაწყდით - თამაში „კორნელიაზე“ და „ელ კლასიკო.“ ჩვენს შედეგებს ვერავინ დააკნინებს.“

„როდრიგოს დრო სჭირდება. სამხრეთ ამერიკელს უდიდესი ტალანტი აქვს. ის მეტად ინტელექტუალი და თავმდაბალი ადამიანია. განვლილი პერიოდის განმავლობაში მან პროგრესი განიცადა და არა ერთ შეხვედრაში შეიტანა გარდატეხა. მას მხოლოდ მოთმინება მართებს. გაგვიმართლა, რომ როდრიგოს დარი მოთამაშე ირიცხება კოლექტივში.“

„თუ შენ დაკარგავ კონკურენტუნარიანობას, ჩემპიონთა ლიგაზე წარმატებას ვერ მიაღწევ. ჩვენი მიზანია ფეხბურთელების ფიზიკური კონდიციები ვმართოთ, რათა ფინალისათვის ყველა 100 პროცენტით მზადყოფნაში იყოს. სწორედ ამიტომ შევიტანე ცვლილებები მადრიდულ დერბიში და მსგავსი სურათი იქნება ვალენსიელებთანაც. ადრე ამბობდნენ, რომ როტაციას არ მივმართავ, ხოლო ახლა პირიქით, არაავინაა ამით კმაყოფილი. ყველამ უნდა მიიღოს სათამაშო წუთები და ამისათვის სათანადო დროა.“

„„ლივერპულის“ ბოლო შეხვედრას მივადევნე თვალი და გარკვეული ანალიზიც გავაკეთე. ამ გუნდს კარგად ვიცნობ. უკანასკნელი 4 წლის მანძილზე, არა ერთხელ მომიწია მათთან შერკინება.“

„ადვილი სეზონი? ეს ფეხბურთელებთან შესანიშნავი ურთიერთობის დამსახურებაა. ჩემთვის პრობლემა არავის შეუქმნია. ადრე გარკვეული გართულებები არსებობდა, თუმცა ეს გასახდელი განსხვავდება. გარკვეულ ფეხბურთელებს, რომლებსაც ჩემპიონთა ლიგა 4-ჯერ აქვთ მოგებული ვუთხარი, რომ მათ დასვენებას ვაპირებდი და პასუხად მივიღე - „არ არის პრობლემა.“ მსგავსი რამ არსად ხდება.“

„თავდაპირველად „რეალს“ არავინ მოიაზრებდა ჩემპიონთა ლიგის ფინალში და სწორედ ამ ფაქტმა დამატებითი ენთუზიაზმი შეიტანა გულშემატკივრებში.“