გერმანიაში, იტალიასა და ინგლისში ასპარეზობის განმავლობაში, ანტონიო რუდიგერი ქარიზმატულ ლიდერად ჩამოყალიბდა.

როგორც იცით, 1990 წლის 3 მარტს დაბადებული ცენტრალური მცველი შემდეგი სეზონიდან „რეალის“ თავდაცვაზე იზრუნებს. ის მადრიდულ გრანდს 4 წლით დაუკავშირებს მომავალს.

ანტონიოს აფრო-გერმანელი მამა და სიერა-ლეონელი დედა ჰყავს, რომლებმაც გასული საუკუნის 90-იან წლებში თავის დააღწიეს სამოქალაქო ომს და ბერლინი-ნიუკიოლნში, ემიგრანტების უბანში დასახლდნენ. მათი ოჯახი საკმაოდ მრავალრიცხოვანი იყო - 4 ქალიშვილი და 2 ვაჟი.

„ბლანკოსის“ მომავალი მოთამაშე ადრეულ ასაკში ხშირად ხდებოდა რასიზმის მსხვერპლი, რაც მხოლოდ და მხოლოდ მოტიავაციას აღძრავდა მასში. 8 წლის ასაკში, როდესაც ასაკოვან ქალბატონს ჩანთის გადატანაში დახმარება შეთავაზა, ამ უკანასკნელმა იფიქრა, რომ ტონი მის გაძარცვას აპირებდა და ყვირილი დაიწყო.

ფიზიკური აღნაგობისა და სიმამაცის გამო, მეგობრები მას რემბოს ეძახდნენ. ის ხშირად ატარებდა ჟორჟ ვეას (პირველი აფრიკელი ფეხბურთელი, რომელმაც „ოქროს ბურთი“ მოიგო) მაისურს. ამასთანავე, დიდი ყურადღებით აკვირდებოდა რონალდოს თამაშებს „ინტერში,“ „რეალსა“ და ბრაზილიის ნაკრებში.

ტონიზე დიდი კვალი დატოვა დღემ, როდესაც უსახსრობის გამო თანატოლებთან ერთად ექსკურსიაზე ვერ წავიდა. მაშინ ახალგაზრდა სპორტსმენის გონებაში გარდატეხა მოხდა.

ადგილობრივ კლუბებში ასპარეზობის შემდეგ, რუდიგერმა ჯერ „ბორუსიას“ ახალგაზრდულ გუნდში მოსინჯა ძალები, ხოლო შემდეგ, 2011, წელს „შტუტგარტს“ მიაშურა, სადაც მალევე დააწინაურეს მთავარი შემადგენლობაში. მას 18 წლის ასაკში ჰქონდა დებიუტი ბუნდეს ლიგაზე და ამასთანავე, სეზონის საუკეთესო ახალგაზრდა ფეხბურთელის ჯილდოს დაბევებაც მოახერხა.

2015 წელს, გერმანელმა მცველმა ქვეყნის საზღვრები გადაკვეთა და „რომას“ რიგებში ჩაირიცხა. ის 2 წლის განმავლობაში იცავდა „ჯალოროსის“ ღირსებას და სწორედ მათი რიგებიდან იასპარეზა პირველად ჩემპიონთა ლიგაზე (სადებიუტო მატჩში „ბარსელონას“ დაუპირისპირდა).

უკვე 2017 წელს, რუდიგერი „ჩელსიში“ გადაბარგდა. თავდაპირველად, ფრენკ ლამპარდი დიდად არ სწყალობდა შეგირდს, ხოლო ტუხელის პირობებში სიტუაცია შეიცვალა: „მე ვაკვირდებოდი შენს თამაშს და იმ აგრესიულობას, რომელიც გაქვს. გულწრფელად მაინტერესებს, საიდან ამხელა ენერგია?“ - ჰკითხა ტომაშმა თანამემუმულეს.

ახლა ანტონიო რუდიგერი იტალიელი მწვრთნელის ჯარისკაცია.