„რეალისა“ და „ესპანიოლის“ თამაშის დაწყებამდე, პრიმერა დივიზიონის თასს „სანტიაგო ბერნაბეუზე“ მიიტანენ.

სასურველი ანგარიშის დაფიქსირების შემთხვევაში, მადრიდელები მსაჯის საფინალო სასტვენის შემდეგვე მიიღებენ კუთვნილ ჯილდოს. როგორც წესი, ტიტულის გადაცემის ცერემონიას სათავეში უდგას ესპანეთის სამეფოს ფეხბურთის ფედერაციის პრეზიდენტი, მაგრამ, გავრცელებული ინფორმაციით, ის მომავალ პაექრობას სხვა ღონისძიებაში მონაწილეობის გამო ვერ დაესწრება.

რიგი ესპანური გამოცემის ცნობით, ანტონიო რუბიალესი ცნობილი სკანდალის შემდეგ (რაც მისსა და ხერარდ პიკეს შორის საუბრის აუდიოჩანაწერის გამოქვეყნებას მოჰყვა), თავს არიდებს ასეთ ხალხმრავალ ადგილებში გამოჩენას და მითუმეტეს „ბლანკოსის“ საშინაო არენაზე.

დიდი ალბათობით, მის ნაცვლად ვიცე-პრეზიდენტი ელვირა ანდრესი მიადევნებს თვალს „რეალის“ საჩემპიონო დაპირისპირებას.