როგორც ჩანს, გარეთ ბეილს უკანა კარის საშუალებით მოუწევს „რეალის“ დატოვება.

მიუხედავად იმისა, რომ „ესპანიოლთან“ დაპირისპირება პოტენციურად საჩემპიონო ხასიათისაა, ანჩელოტის მაინც ჩემპიონთა ლიგის ნახევარფინალის განმეორებით შერკინებაზე უჭირავს თვალი, სადაც მადრიდელთა მდგომარეობა ბევრად რთულია. შესაბამისად, იტალიელი სპეციალისტი კატალონიელების წინააღმდეგ გადახალისებული შემადგენლობის განწესებას გეგმავს.

ესპანური მედია აქტიურად წერდა იმის შესახებ, რომ ასეთ პირობებში უელსელ შემტევსაც მიეცემოდა თავის გამოჩენის საშუალება, რაც მისთვის შანსი იქნებოდა, ღირსეულად დამშვიდობებოდა ადგილობრივ პუბლიკას. როგორც იცით, ბეილს 30 ივნისს ეწურება ესპანეთის დედაქალაქში ყოფნის ვადა.

გარეთმა დასკვნით ვარჯიშზე სრული დატვირთვით იმუშავა, მაგრამ ბოლო წუთს მისი განაცხადიდან ამორიცხვა მოხდა. გავრცელებული ინფორმაციით, ამის მიზეზად გარკვეული დისკომფორტი დასახელდა (ტკივილები ზურგის არეში). პარალელურად, სხვადასხვა წყაროები იმასაც კი ამბობენ, რომ მოთამაშემ უბრალოდ არ ისურვა ხვალინდელ შეხვედრაში მონაწილეობის მიღება.

კალენდრის მიხედვით, სეზონის დასრულებამდე, „რეალი“ კიდევ 2 პაექრობას ჩაატარებს „სანტიაგო ბერნაბეუზე“ - „ლევანტესთან“ და „ბეტისთან.“ არსებული სიტუაციიდან გამომდინარე, უკვე რთულია იმის თქმა, გამოჩნდება თუ არა საერთოდ ბეილი მადრიდისტების წინაშე.

წლეულს, ბრიტანელმა უფრო მეტი სათამაშო წუთები ნაკრების მაისურით გაატარა, ვიდრე კლუბის. საერთო ჯამში კი, 8 წლიანი მადრიდული კარიერის თავზე, ის 258 თამაშსა და 106 გოლს მოითვლის.

თითოეულ მადრიდისტას შესანიშნავად გვახსოვს მისი ფეერიული ასპარეზობა „კოპა დელ რეისა“ და ჩემპიონთა ლიგის ფინალურ ორთაბრძოლებში, მისი დიდებული შედეგიანი დარტყმები და ღვაწლი გუნდის წარმატებაში... ახლა კი ორმაგად სამწუხაროა ბეილის ხილვა მსგავს სიტუაციაში...