წინა წლების განმავლობაში ვინისიუსს კრიტიკის ფონზე უწევდა ბურთაობა, თუმცა მიმდინარე სეზონში ყველაფერი თავდაყირა დადგა.

ანჩელოტის პირობებში ბრაზილიელმა ფეხბურთელმა დიდი პროგრესი განიცადა და ახლა თამაშიდან თამაშამდე ამტკიცებს, რომ „რეალმა“ მისი ბრაზილიიდან ჩამოყვანით სწორი გადაწყვეტილება მიიღო.

ზაფხულის შვებულებამდე რამდენიმე თამაშით ადრე, ვინი უკვე 18 გოლსა და 18 ასისტს მოითვლის. მან შესანიშნავი ეპიზოდი შექმნა „ეტიჰედზე,“ როდესაც ბურთთან შეხების გარეშე გვერდი აუარა ფერნანდინიოს, შემდეგ დაახლოებით 50 მეტრი ირბინა და ბოლოს შედეგიანად დაურტყა ედერსონს. აღნიშნულმა ეპიზოდმა კიდევ ერთხელ ცხადყო, თუ რაოდენ ნიჭიერ და მაღალი დონის მოთამაშესთან გვაქვს საქმე. სამხრეთ ამერიკელი დიდებულად გამოიყურებოდა, როგორც პარიზელების, ასევე ლონდონელების წინააღმდეგაც. მან რამდენიმე საგოლე გადაცემა დაარიგა განვლილ პაექრობებში.

რამდენიმე თვეში ვინი ახალ კონტრაქტს გააფორმებს მადრიდულ გრანდთან. მისი ყოველწლიური ანაზღაურება და გამოსასყიდი თანხა მნიშვნელოვნად გაიზრდება.