13 სეზონი გავიდა მას შემდეგ, რაც კარიმ ბენზემამ დადგა ფეხი მადრიდის მიწაზე.

2009 წლის ზაფხულში, „რეალმა“ 35 მლნ. ევრო ჩაუთვალა „ლიონს,“ მეტად პერსპექტიული და ნიჭიერი თავდამსხმელის სანაცვლოდ. ამდენი ხნის გასვლის შემდეგ კი, ფრანგი ფორვარდი „ოქროს ბურთის“ მოგების მთავარ ფავორიტად ითვლება.

პირველივე დღეებიდან ფლორენტინო პერესს დიდად ეიმედებოდა მისი. პრეზიდენტს ყოველთვის სჯეროდა, რომ დადგებოდა დრო, როდესაც ბენზემა მსოფლიოს საუკეთესო ფეხბურთელი გახდებოდა.

34 წლის კარიმი „რეალის“ მაისურით 600 თამაშს, 320 გოლსა და 20 ტიტულს მოითვლის. კრიშტიანუ რონალდუს კლუბიდან გადაბარგების შემდეგ, ის შემადგენლობის ლიდერად ჩამოყალიბდა და აღნიშნულ პასუხისმგებლობას ღირსეულად ატარებს.

როგორც ზემოთ აღვნიშნეთ, ბენზემა 2022 წლის „ოქროს ბურთის“ უმთავრესი პრეტენდენტია. მის კონკურენტებად რობერტ ლევანდოვსკი, კევინ დე ბრუინი და მო სალაჰი ითვლებია, თუმცა უდავოა, რომ ამ ეტაპისათვისთ არავინ ბურთაობს ისე, როგორც ბენზემა, რასაც სტატისტიკური მონაცემებიც მოწმობს.

ფრანგი კარს მომდგარ უქმეებზე გაიფორმებს პრიმერა დივიზიონის ტიტულს, ხოლო მომდევნო კვირაში ჩემპიონთა ლიგის ფინალური საგზურის მოსაპოვებლად ძალისხმევას არ დაიშურებს. კარიმი ლა ლიგისა და ევროპის ყველაზე პრესტიჟული საკლუბო ტურნირის მიმდინარე გათამაშების ბომბარდირია, შესაბამისად, 25 და 14 გოლით. ამას ემატება მის მიერ შესრულებული 13 ასისტიც. მოთამაშემ ეროვნულ ნაკრებთან ერთად რამდენიმე თვის წინ ერთა ლიგის მოგებაც მოახერხა.

რაც შეეხება ისევდაისევ „ოქროს ბურთის“ დაჯილდოვებას, ამჯერად, ივნისში გაიმართება. გამოკითხვაში მონაწილეობას მხოლოდ „ფიფას“ სანაკრებო რეიტინგში პირველი 100 ქვეყნის ჟურნალისტები მიიღებენ. გავრცელებული ინფორმაციით, წინა წლებისგან განსხვავებით, ყურადღება გამახვილდება ფეხბურთელის ინდივიდუალურ მიღწევებზე.

და ბოლოს, უკანასკნელი პერიოდის განმავლობაში, კარიმისთვის საუკეთესოობის მინიჭებას უკვე არა ერთი ცნობილი ადამიანი ემხრობა. მათ შორის არიან: რონალდო, რიო ფერდინანდი, მესუთ იოზილი, კუნ აგუერო და ა.შ.