შარშანდელისაგან განსხვავებით, წლევანდელი ზაფხული ნამდვილად ცხელი იქნებიან „სანტიაგო ბერნაბეუზე.“

როგორც იცით, მომავალ სატრანსფერო ფანჯარაზე კლუბის მთავარი მიზანი კილიან მბაპეს გადაბირება იქნება. ამ უკანასკნელს 30 ივნისს ეწურება პარიზულ გრანდში ყოფნის ვადა და უკვე ამის შემდეგ ძალუძს „რეალს“ კონტრაქტის გაფორმება. მადრიდელების სურვილია, რომ ამერიკის ტურნემდე, სადაც „მილანთან,“ „იუვესთან“ და „ბარსასთან“ გამართავენ ამხანაგურ შეხვედრებს, მოაგვარონ ფრანგთან დაკავშირებული საკითხები.

პარალელურად, „ბლანკოსი“ შეეცდება ანტონიო რუდიგერთან მოლაპარაკებების წარმატებით დასრულებას. გერმანელი მცველიც რამდენიმე თვეში თავისუფალი აგენტის სტატუსს მოირგებს. ამ ეტაპზე ერთ-ერთი შემაფერხებელი ფაქტორია მოთამაშის ეკონომიკური მოთხოვნები.

ამასთანავე, ესპანეთის დედაქალაქში საკმაოდ სერიოზულად განიხილავენ ჩუამენის კანდიდატურასაც. ახალგაზრდა ნახევარმცველს „თეთრების“ სკაუტები თვეების განმავლობაში აკვირდებიან.

რაც შეეხება ერლინგ ჰოლანდს, შეიძლება ითქვას, რომ „რეალი“ აღარ ფიქრობს ნორვეგიელ გოლეადორზე, ვინაიდან ისინი მზად არ არიან დააკმაყოფილონ მოთამაშისა და მისი წარმომადგენლის ფინანსური მადა.