სეზონი გადამწყვეტ ფაზაში შედის, „რეალი“ კი 2 მთავარ ტურნირზე აგრძელებს ბრძოლას.

ოთხშაბათს, ანჩელოტის შეგირდებს, არანაკლებ რთული გასვლითი შეხვედრის ჩატარება მოუწევთ პამპლონაში, რომლის დასრულების შემდეგაც, დაახლოებით 6 დღე ექნებათ რეზერვში ჩემპიონთა ლიგის მატჩამდე. გამომდინარე იქედან, რომ მომდევნო უქმეებზე ესპანეთში ჩანიშნულია „კოპა დელ რეის“ ფინალი, ლა ლიგის შეხვედრები არ გაიმართება, რაც, რა თქმა უნდა, პირველ რიგში „თეთრების“ წისქვილზე ასხამს წყალს. იტალიელ სპეციალისტს შესაძლებლობა ექნება სრულფასოვნად მოამზადოს შეგირდები პირველი ნახევარფინალური პაექრობისთვის. აღნიშნული თამაში 26 აპრილს, „ეტიჰედზე“ შედგება.

საინტერესოა, რომ მანჩესტერიდან დაბრუნების შემდეგ, მადრიდელებს 15 მაისამდე არ მოუწევთ ქალაქის დატოვება. ამ პერიოდის განმავლობაში ისინი „სანტიაგო ბერნაბეუზე“ უმასპინძლებენ „ესპანიოლს“ (30 აპრილს), „სიტისა“ (4 მაისს) და „ლევანტეს“ (11 მაისს), ხოლო ერთადერთ გასვლით დაპირისპირებას მეზობელ რაიონში „ვანდა მეტროპოლიტანოზე“ ჩაატარებენ (8 მაისს).

როგორც ხედავთ, კალენდარი „თეთრებს“ საშუალებას აძლევს მაღალ დონეზე შეხვდნენ დარჩენილ ორთაბრძოლებს, რათა სეზონი ტრიუმფით დაასრულონ.