სამეფო კლუბმა კიდევ ერთი დიდებული საღამო აჩუქა გულშემატკივრებს.

როდესაც ანჩელოტის შეგირდები შესვენებაზე გავიდნენ, ისინი 2 ბურთიანი სხვაობით მარცხდებოდნენ ადგილობრივ „სევილიასთან,“ თუმცა მეორე ტაიმში ყველაფერი შეიცვალა. „რეალმა“ შეძლო ჩამორჩენის აღმოფხვრა და მეტიც, დედაქალაქში 3 ქულით გაემგზავრა. შეხვედრაში საბოლოო წერტილი კარიმ ბენზემამ დასვა. ამ უკანასკნელმა 92-ე წუთსა და 16 წამზე გამოიჩინა თავი.

ისტორიას თუ გადავავლებთ თვალს, საოცარ დამთხვევას გადავაწყდებით. 2010 წელს, „სანტიაგო ბერნაბეუზე,“ „თეთრები“ ანალოგიურად 0-2 აგებდნენ სევილიელებთან და პელეგრინის დამოძღვრილებმაც მოახერხეს დაპირისპირების შემოტრიალება. საინტერესოა, რომ მაშინაც, გამარჯვების გოლი 92-ე წუთსა და 16 წამზე გავიდა. მისი ავტორი კი რაფაელ ვან დერ ვაარტი გახდა.