ლონდონელებთან გამეორებით შეხვედრაში ედერ მილიტაოს არყოფნამ, სამეფო კლუბს საკმაოდ დიდი პრობლემები გაუჩინა.

მატჩამდე რამდენიმე დღით ადრე, ბრაზილიელის დისკვალიფიკაციას ხესუს ვალეხოს კორონავირუსიც დაემატა და ანჩელოტი მხოლოდ 2 ნომინალური ცენტრალური მცველის, ალაბასა და ნაჩოს იმედად დარჩა. იტალიელმა დამრიგებელმა დასახმარებლად „კასტილიას“ მიმართა და თამაშის განაცხადში ახალგაზრდა რაფა მარინი შეიყვანა.

აღსანიშნავია, რომ დაპირისპირების 88-ე წუთზე, როდესაც ნაჩომ მოედნის დატოვება ითხოვა, ანჩელოტი დილემის წინაშე დადგა. გავრცელებული ინფორმაციით, ის გეგმავდა ტანმაღალი მარინისათვის შანსის მიცემას, თუმცა ასისტენტმა ბოლო მომენტში გადააფიქრებინა. დავიდემ მამას ურჩია, გამოუცდელ მოთამაშეზე ფსონი არ გაეკეთებინა და ფერნანდესის პოზიციაზე, კარვახალი გადაეწია, რომელსაც აქამდე არასოდეს უთამაშია ცენტრალურ მცველად.

მიუხედავად საკმაოდ დიდი რისკისა, ამ გეგმამ გაამართლა. „ჩელსის“ ბევრი მცდელობისა მიუხედავად, მადრიდელებმა მეტი გოლი აღარ გაატანინეს. რაც შეეხება დანიელს, მან მეტად თავგანწირული თამაშის წყალობით, ახალი ამპლუა წარმატებით მოირგო.

არ არის გამორიცხული, რაფა მარინს „სევილიას“ წინააღმდეგ მიეცეს სათამაშო წუთები, ვინაიდან გუნდში საკადრო პრობლემებია.