როგორც უკვე იცით, ჩემპიონთა ლიგის ნახევარფინალურ სტადიაზე „რეალისა“ და „მანჩესტერ სიტის“ გზები გადაიკვეთა. პირველ პაექრობას ინგლისი უმასპინძლებს, ხოლო მეორეს ესპანეთი.

ევროპის ყველაზე პრესტიჟული საკლუბო ტურნირის ისტორიაში, ანჩელოტისა და გვარდიოლას კლუბები 6-ჯერ დაუპირისპირდნენ ერთმანეთს. მათი კონკურენციის ისტორია კი 2012 წელს, საკმაოდ დრამატული და ემოციური მატჩით იწყება. „სანტიაგო ბერნაბეუზე“ ჯგუფური ეტაპის ფარგლებში, „ქალაქელები“ 85-ე წუთისათვის 1-2 იგებდნენ, თუმცა მოურინიოს შეგირდები დიდებული „ქამბექით“ გამოირჩნენ. 87-ე წუთზე, ჯერ ბენზემამ გაათანაბრა ანგარიში, ხოლო 90-ე წუთზე, რონალდუმ შეაგდო გამარჯვების გოლი (3-2), რასაც პორტუგალიელი სპეციალისტის მხრიდან დასამახსოვრებელი აღნიშვნა მოჰყვა. რაც შეეხება საპასუხო შეხვედრას, გუნდემა შედეგიანი ყაიმი დააფიქსირეს (1-1). პაექრობის დებიუტში კარიმის გოლი, 73-ე წუთზე აგუერომ გაქვითა თერთმეტმეტრიანის ნიშნულიდან.

„თეთრებისა“ და „ცისფერების“ მორიგი ჯახი 2016 წელს, უკვე ნახევარფინალურ ეტაპზე შედგა. თავდაპირველად, „ეტიჰედზე“ ნულოვანი ფრე დაფიქსირდა, ხოლო საპასუხო მატჩში, ფერნანდო რეგესის ავტოგოლის წყალობით (1-0), „რეალმა“ ფინალში გასვლის უფლება მოიპოვა, რასაც შემდეგ „ატლეტიკოს“ ძლევა და თასის აღმართვა მოჰყვა.

რაც შეეხება მათ ბოლო ორთაბრძოლას, ჩ/ლიგის მერვედფინალებში, „სიტიმ“ ორივე შეხვედრის ერთნაირი ანგარიშით მოგება შეძლო - 1:2, 2:1.

აღსანიშნავია, რომ „ბლანკოსის“ მოქმედი გოლეადორი ბენზემა, ბრიტანელების წინააღმდეგ 3 შედეგიან დარტყმას მოითვლის. მომავალ თამაშებში მასზე ბევრი რამ იქნება დამოკიდებული.